【曾智华专栏】唱一场，可收山

上世纪八十年代，红磡体育馆落成，巨星纷纷排队开演唱会。非常犀飞利，一开就是几十场，包括许冠杰、谭咏麟、徐小凤、林子祥、梅艳芳及张国荣等极具号召力的巨星。
　　
最巴闭为1992年的《许冠杰光荣引退演唱会》，竟然开足四十一场，非常得人惊。
　　
当时我与一位极具前瞻视野的制作人大A闲谈，提出一个疑问：「哈，阿Sam的体能，从何而来的呢？晚晚在台上高度紧张，必定大量透支肾上腺素，可能好长手尾㖞，有冇需要咁唱法？简直揾命博㖞！」
　　
A哥笑笑口：「得嘅，点解佢哋系巨星，我哋唔系，正因可以能人所不能。不过咁，除非班巨星真真正正享受年复一年不停站舞台『卖唱』，否则，以现今科技发展，我俩退休前，应该出现『唱一场，可收山』的情况！」
　　
即系点？即系一个巨星，精心炮制一场「只此一次」的演出，当然幕后不惜工本，撚到个个乐迷认为唔睇会一世后悔的演唱会。
　　
点解做一场就得？因通过最新科技，可全球直播（讲时仍未有）。到时家家户户的电视画面可能大到飞起，也高清到纤毫毕现，加上音响超级，享受可能比现场更高。
　　
A君当年指，只要度掂点样收费就掂。一户唔使多，收一百元已掂。全球中国人一齐睇，一亿户就收一百亿元，十亿户就收一千亿元！
　　
当年可能仍是一个遥远的梦，但今天？已百分百可行并将出现。边个做？正正是红磡场数纪录保持者许冠杰！
　　
不过，并非为赚大钱，而只是作为一个率先突破的制作，日期是4月14日，名《许冠杰全地球大合唱》。
　　
今次网上直播通行证为二百八十元。主办单位将送出一千条Link作慈善，大家有兴趣，上网打「许冠杰」应已乜都知嘞。