【曾智华专栏】《申诉王》命中市场

做传媒，必须百分百精准面对市场，掌握受众需要，千祈咪「射歪去隔篱」。
如今电子传媒，无论电视或电台的滑落，除因互联网兴起外，自己的节目未能吸引大众，也是主因。
小弟昔日长期打「电台仗」，当然对争取收听率有些微经验，故此，才大胆讲一句——今时今日电台唔系冇人听（朝朝几十万部汽车在路上，司机冇得睇手机），而系⋯⋯问题在电台管理层身上，正是种瓜得瓜，种豆唔会变咗瓜㗎！
报章也同理。印刷传媒因成本太贵，转电子化，合理。咁唔代表应该少咗人睇「报纸」，问题用乜「睇」矣。你的内容吸引，读者又点会流失？故此，掌舵人要不停捉摸市场需要，作
出改革，锁定读者口味「发射」。中的话，自然广告滚滚来！
三月一日，《头条日报》开始大改革，日日有主题，率先登场的是《星岛申诉王》，设立热线9199 9933，收料然后行动，睇嚟冇一队人去做，难有效果，应该相当重本。
做传媒，必杀秘笈为替小市民申冤抱不平，因大部分政府部门「唔踢唔郁」，若你单单写封投诉信，结果可能石沉大海，也可能会收到官样答复——谢谢意见，我们将会跟进⋯⋯然后关人过关。
但见诸传媒就唔同，因公关部必须剪低，传畀所有管理层睇。局长/署长一睇，必责成下层——唔该你搞掂佢。如此，由上而下，即掂。
人要面，树要皮，冇一个高官会接受部门负面嘢经常曝光也。更甚，若畀特首睇到，畀个电话「关心吓你」，咁就真系瘀死！所以，若《申诉王》能成功整返几单大嘢，为市民申冤，咁一定会响招牌，然后起纸，然后广告滚滚来！睇睇事态会否如此发展先。