【曾智华专栏】骑师一哥≠马会一哥

上周日真快乐，因见到偶像女骑师贾杰美，跑八场有五场入Q，上周六本栏正正指明要捧佢，你可有大丰收？

骑师也是人，十人生九品，有啲似贾杰美般可爱，有啲则似潘顿般火爆。潘顿贵为「香港一哥」，骑功无可置疑。不过，有骑功并不代表有骑品，尤其近年，可能成绩愈来愈好，带离晒，慢慢形成咗一种目中无人心态，真系闹人唔使本。

其实佢口舌招尤早有前科，也曾被重罚。不过冇改进不止，闹吓闹吓，连唔应该闹、唔闹得的人也照闹，怎不惹祸上身？受薪董事方显韬刚刚上任不久，你潘顿睇唔起佢，可以私底下埋怨，甚至对佢处罚的判决上诉，但万万不可公开闹，此乃天条！
　　
因咁搞法，马会管理层一定出手，以免骑师冇规冇矩都过到骨，咁仲成世界？你系骑师一哥，但绝非马会一哥，唔该搞清庄闲，咪冇大冇细，作出极恶劣的示范。

回想管理电台的日子，小弟也不时被朋友问：「喂，碌Sir，点解𠮶位唱片骑师/主持收听率咁高，又有大量广告，仍然『被离职』呢？」

正常情况，任何电台当然锡晒受欢迎及「生金蛋」的主持。不过，人生就是如此，个人修为力低的，很易先而恃宠生娇，继而目空一切，视规矩如无物。起初管理层也必会好言相劝，不过⋯⋯一旦当事人觉得自己是「广播之神」时，就真系冇得救。因佢会胁持埋电台编辑权，肆意横行。咁发展，结局一定是——自我毁灭！

今晚快活谷赛事，一于捧告东尼三匹评分未尽，仍在进步中的年轻马——「加州得力」、「加州一宝」及「正气青驱」。难得全部执靓档，WP三串七过关可也！