【曾智華專欄】問佢四個問題

投資世界，一如任何世界，良莠不齊。不過，投資世界更甚的，是涉及金錢。
　　
眾所周知，有錢的地方就有騙子。愈多錢的地方，就愈多騙子，合法及非法的皆有。
　　
例如股市，不少投資銀行家證券包銷商，專教生意人，將旗下生意上市，替佢哋一條龍服務，由執靚盤數，到作個美化未來故事，搵公關公司組織「合唱團」，在傳媒大力唱好，然後正式申請。
　　
上市前，更可能搵幾個有頭有面者「站台」Endorse（當然要畀著數啦）。好嘞，一旦成功上市，先圍內再發放多多利好消息，舞到高高，引散戶入市，然後「仙女散花」！
　　
你咪以為小弟好醒，早年也中過不少招，本來五十歲時開始，已經人老精，鬼老靈，想呃我？死開啦！
　　
但終於，2017年再衰一次。聽咗個漂亮故事，決定買入雷蛇（已除牌，之前編號1337）。本來冇買錯，錯在畀佢個大老闆陳民亮玩咗一劑。此股上市定價3.88元，開市即炒到上5.12元，然後……股價一路「謝過謝老四」，但其實生意不差，似有人為撳低股價，搞到小股東冇晒癮。終於，突然2021年閃電出手私有化，只畀2.82元！
　　
上市時攞人3.88元，玩完幾年私有化變2.82元，明搶每股超過一蚊，呢個陳民亮都算犀利嘞。
　　
今日講起畀人當水魚，因有老友問：「碌Sir，有保險集團Sell我，話有隻穩陣每年一成回報基金噃，買唔買呢？」
　　
「穩陣？一成？乜有咁大隻蛤乸隨街跳的嗎？你先要個經紀老老實實答：一、係咪簽死有年息十厘？二、基金是否隨時可沽出唔使蝕？

三、咁筍回報，佢有冇自己借盡貸款瞓落去？

四、點解有啲投資可以十厘回報，但存銀行定期只有兩三厘，有人儍咗？」