【曾智华专栏】坚决永不代人投注

今日标题，是否看似好无情？喂，叫你顺便帮手投注，使乜出到「坚决永不」咁绝啊？
　　
昨天老友高佬M来电：「碌Sir，小弟在外忙紧，可否替我买条十蚊鸡六环彩，号码为⋯⋯下周见到面畀返钱你，中就请食大餐！」
　　
唉⋯…又嚟⋯…又要做「衰人」了：「M哥，唔好意思，麻烦另请高明！因我三十年前已发誓，永不再替朋友落注，唔好意思！」
　　
「有冇搞错？帮朋友做少少嘢都托手㬹？」
　　
阿M的反应，完全意料中，因久不久就有朋友提出同样要求，我也是坚决拒绝。幸而详细讲出背景故事后，个个明白，再冇埋怨。
　　
背景故事，三十年前一日，跑夜马，老友肥C来电，有如高佬M，托小弟到投注站买条六环彩（其时未有手机投注）。心谂，Easy啦，反正得闲，踱步到附近投注站，按畀出的六只赛驹号码，填咗张飞，十蚊鸡搞掂。
　　
转眼跑完马，枱头电话大响，传来震耳欲聋欢呼声：「阿碌，发达喇，发达喇，六只中晒，全部W，派二十几万元！快啲约期食日本菜！我已通知老婆大人，一于两对夫妇，狂擦一餐！」
　　
原来系肥C，哗，咁犀利，速速攞佢张飞出嚟对对先⋯⋯晴天霹雳，简直想撼头埋墙死咗佢，因最尾一关填错号码，变咗食白果！
　　
你话点办？一心帮朋友，搞到「成裤都系」。难道自己「派彩」二十几万元（当时月薪一万元）？
　　
唉⋯⋯终于诚心道歉，但就咁冇咗个老友，仲畀佢老婆在人前人后怨足三十年（当然有这样那样的「怀疑」啦）！
　　
经此深刻教训后，话知你系主席、总理、特首，揾我代投注，一律坚决Say No！
　　
明天又跑大赛，香港金杯跑平磅，轮到「浪漫勇士」炼低「全鎗六十」！
　　
香港经典杯，一于捧偶像贾杰美！