【曾智华专栏】叶刘「成功争取」

今日标题，大家有冇好奇怪，点解我讲成功争取要用引号呢？有乜意思呢？
　　
小弟并非「盲公陈」，又冇水晶球。不过，浸在传媒圈多年，观察政治，当然有少少心得。故此早前在本栏「公布」，叶刘必能「成功争取」，财爷将会增加足球博彩税，不过，幅度不会太大，若大到马会高调反弹，则盏大家冇瘾。
　　
政治圈与娱乐圈相若，好多嘢其实做场戏，早早有晒剧本。剧本中人人有个角色，最好大家都得益，否则就算冇着数，都要铺排各方落到台，咁就应该「顺利演出」，皆大欢喜。
　　
我睇呢次加足球博彩税也有剧本！背景为香港大大财赤，当然要加这样那样的税。在新税种不能开之下，财爷当然要睇睇边度落手会最少反对声音啦。简单推测，加香烟税及足球博彩税，最「好虾」，因对方也反抗无力，故此必定中。
　　
若如此，「政治剧本」可能是：反正要加，咁就益吓人「成功争取」喇，搞搞公关。
　　
首先，通过不同渠道通知「吸烟与健康委员会」及「禁烟团体」，你哋大力提出诉求啦！
　　
然后再拣吓边个政客或政治团体要卖帐。咦，正㖞，不如「卖」畀行政会议召集人、位高权重的叶刘啦。等佢跳出来指手画脚「为民请命」，然后吓到马会弹起，开火还击，要求交换条件，叶刘则一于企硬，誓不低头。剧终，财爷听到民意，从善如流，接纳新民党意见。
　　
就咁，「剧本」顺利演出，财爷无风无浪「回应民情」，决定增加烟税及足球博彩税。
　　
叶刘及其政党为民请命，成功争取，更协助政府减轻财赤，大大有功，锡晒！
　　
马会呢，好似轻微受损。不过，唔怕！好快会还盅，必有糖食。
　　
玩政治，有来有往㗎。