【曾智華專欄】佛系留人才

全世界先進城市面對同樣問題：一、人口老化。即工作人口愈來愈少，納入息稅者同樣下降，於是年輕工作人口孭稅愈來愈重；二、願意生小孩的父母日比日少，令年輕人口也隨之下降，進一步推低維持社會經濟及參與建設的Workforce；三、社會全面步入科技化。
　　
以上三點，任何有責任心、有視野的政府，皆必會早早未雨綢繆，絕不容許管治的城市或國家步向陰乾。
　　
點搞？除動用一切誘因，希望年輕夫婦多生孩子外，另一方法就有如商業機構——挖角！將別個城市年輕的、專業的、高教育水平的人口挖到自己地方，加強競爭力。
　　
這個情況，近兩年愈演愈烈，尤其加拿大、英國、澳洲、新加坡等，皆積極出招。
　　
最近，連一向「不歡迎移民」的日本，也突然轉性改政策，希望爭取大量優質外國人才，成功申請者，最快一年可獲永久居留權。
　　
睇睇我哋香港，真真大件事！生育率跌至三十年新低，老化人口新高，淨移出人口也是新高，原因唔使解釋喇啩？
　　
相對之下，香港的搶人才計劃，至今為止，仍是非常蒼白，效果奀豬，真的是「同志仍須努力」！睇睇過去一年的「優秀人才入境計劃」，其實只是另一個「內地居民申請到港工作計劃」，因絕少內地以外人士申請。
　　
其實你知我知，香港近兩年流失人才，尤其三十至四十五歲當打的，十分嚴重。政府應積極思考去做，最優先的，其實是「留人才計劃」。將十個想走的減低至兩至四個，已算非常成功。總之就係要「做啲嘢」，不能似如今的「佛系態度」，用自由移動為藉口，放走大量人才。點做？收幾十萬元月薪的高官，一定有橋嘅。