【曾智华专栏】九大挑战全部硬嘢

香港马会在国际马坛的江湖地位，究竟有几高？答案简单，你睇睇应家柏总裁坐乜位就知——亚洲赛马联盟主席！

几日会议中，应总精力爆表，讲得又玩得，分析完国际赛马业九大挑战后，到晚上联欢会，又唱又跳，带领参加者玩到癫。

相比其他华人领袖，多数木木讷讷、含含蓄蓄，要与不同国籍人士打成一片，略为蚀底。中国领导人更加唔使讲！唯一一位玩得的，只有刚逝世的江泽民，豪情奔放，又唱又跳，故此当年出访外国，令国家形象大丰收。讲返「九大挑战」，真系瓣瓣都唔简单，好恶搞。这个「恶搞」，令我想起昔日做中层管理时，难忘的一幕。

升到中层，开始有机会在高层会议中坐第二排，只听不讲，因自己两层上司在前排。
　　
某次会议，一位中高层阿A汇报工作时，提到：「这项工作难度好高，失败机会好大⋯⋯」

佢都未讲完，立即被大波士截住，当住全体管理人面前喷：「A先生，你坐几高位，担当乜嘢角色，收几钱月薪，有几大权，究竟自己知唔知？工作唔难，使乜你做？大家只想知道你会点克服佢，完全冇兴趣听有几难、失败机会有几大，冇人要求你一定成功，只想知你点会令佢成功！」

一面屁之后，红都面晒，立即收声。从此冇人再敢在大波士面前呻工作困难，个个只谂点样「死掂佢」，以免畀人兜口兜面省镬金！赛马事业面对挑战，当然劲，但各地总裁个个几千万元年薪，唔该你哋「死掂佢」！咪呻！

今晚又跑快活谷，小弟再捧「谷中王者」何泽尧！尤其以下四只：「百胜名驹」、「得力宝驹」、「风中劲松」及「赤火骁龙」，一于WP过关可也！