【曾智華專欄】野心很大的電影

期待已久，終於進場觀看了《風再起時》。一邊睇，一邊覺得此片不應只睇一次，起碼睇兩至三次，因可供欣賞的元素實在太多了，瓣瓣也可以抽離逐一細味。
　　
例如演技。兩大男主角皆著名靚仔型佬，不過一拍埋，就知梁朝偉的魅力高半班。影帝同場，自會鍊出火花，賞心悅目。
　　
明顯，為拍此片，郭富城有一定的犧牲，曾經要「糟肥」自己，爆出個肚腩，以迎合一個步入中年肚滿腸肥的探長形象。
　　
上海女星杜鵑，在極級美指及服裝設計苦心經營下，一出場已有傾倒眾生的艷光，犀利。不少內地出色的女星，總有一種「狠」藏在眼神之中，杜鵑也有，故後來變成心狠手辣而不感兀突，選角者應記一功。
　　
三大主角之外，其他演員陣容，一睇，又係「嘩」的一聲，因不少重量級人馬在內，例如許冠文、太保、譚耀文、張繼聰、吳耀漢、謝君豪⋯⋯
　　
此片導演翁子光本來有極大野心，故第一Cut出來，長達六小時。若如此，相信所有出色演員都有發揮機會。可惜如今剪剩兩個多鐘，搞到極之嘥料。例如張繼聰咁嘅卡士，只扮演雜差，閃出閃入三兩場就冇咗。
　　
值得一提為謝君豪，冇得唔服，演乜都上晒身。剛剛睇完佢在《過時．過節》中扮落寞無奈中年丈夫，一轉身即變《毒舌大狀》的型佬控方大狀，好嘞，到《風再起時》，又變變變，變成大毒梟跛豪。
　　
以上三個角色，有截然不同的內心世界及外形，全畀佢掌控到，服未？
　　
說來此片真是好演員大浪費，包括周文健、艾迪、張兆輝、張可頤、金燕玲⋯…因場面太多，人物太複雜，故未能一氣呵成。唔收得，與此有直接關係！