【曾智華專欄】明天只捧「堅又威」

馬名，絕對反映馬主心態，有的與人為善，有的優雅，有的謙虛，有的暴發，有的充滿霸氣，有的沉溺政治，有的迷信⋯⋯乜都有。
　　
最近黎昭昇馬房有隻新馬，名「喜報圍家」，好渣波，出五次，冇贏、冇入位、冇升班不止，反之，三班起步，跌落四班，由六十五分減到五十七分。照計以黎昭昇背景咁猛料，冇理由會入隻咁差新馬喎，真難明，次次輸三個幾到八個幾馬位，近都唔近吓。
　　
某某資深馬主一嘢篤正，笑笑口話乃因改錯名：「碌Sir，隻馬改錯名呀！『喜報圍家』真係唔湯唔水，唔知想表達乜。真㗎，我就聽到Call馬員大大聲嗌『起步為艱』又大漏，彈出包尾⋯⋯事實，佢近三場冇次出閘順利㗎！」
　　
好，講講明天，小弟一年一度入場！點解？因大群聖若瑟書院師弟仔，用校徽顏色——綠及白，組成一個賽馬團體——Green and White Racing Syndicate，從澳洲引入一匹自購新馬，三歲，評五十二分，四班起步。
　　
叫乜名呢？個賽馬團體用英文譯成中文，正是「堅又威」（反映幕後心態？），故此，第一匹馬就叫「堅又威」！聽落係咪好勁咁呢？
　　
周日報跑千二米，練馬師姚本輝擅長操短途馬，唔好唔出，故此我一定捧場，何況有著母校的感情？
　　
說來此馬的父系及母系，名字也畀人「快過火箭」之感，絕對唔嘢小！父系叫Smart Missile，母系呢，則叫Twin Star Rocket。
　　
講起聖若瑟書院舊同學（即聖Joe仔）夾分養馬，小弟三十年前也試過，做埋經理人。不過，冇晒癮，養咗隻「好易贏」，結果一場都未贏過就退役。個別組員由熱烘烘到冷冰冰，後期搞到唔願再夾錢交養馬費，最終唯有散Band。
　　
希望「堅又威」真的又堅又威，明天衝W！