【曾智華專欄】點解陪明星睇星？

萬眾期待的《風再起時》今日上映，小弟將第一時間飛身入場，之後再講看後感受。
　　
不過，睇報道，個心未免一沉。因此片內地票房出奇地麻麻，只得三千幾萬元，真是「爆大冷」！因理論上，單單擺出兩大金像獎影帝梁朝偉及郭富城，常理看，也必億億聲啦，點解會「搞成咁」？我都想知。究竟是否中港兩地的觀眾，品味及要求完全不同呢？
　　
此片導演翁子光，撮合兩影帝過程，也搞到一頭汗。郭富城易啲，因曾合作《踏血尋梅》。但梁朝偉呢，根本推戲多過接戲，又成日自己放假去流浪，享受做個孤獨者（Loner）的樂趣。
　　
翁子光設計南江角色時，早早鎖定最適合人選為偉仔，故為游說佢，花咗好多時間去建立一段真誠友誼。不過，梁朝偉性格好少鮮明話Yes，結果，翁導演忐忑了一大段日子，都諗住冇機會時，才收到偉仔答應電話，真係畀佢玩殘！
　　
講到導演或監製游說巨星演出，真係各師各法。一般巨星級人馬，無論歌星或明星，必定非常之計較。反正大把人搵，所以推Job唔使眨眼。錢為一大考慮，另外，你套戲或音樂會製作，有乜設計先？會否做「壞」我㗎？
　　
所以，製作人要游說巨星Say Yes，真係分分鐘「乜都要做」！
　　
例如有位歌星早早處半收山狀態，反正對生活質素要求不高，而食唱片版稅已夠過世，根本就冇興趣拋頭露面再開演唱會。
　　
不過，某製作人乃佢粉絲之外，更肯定歌星若開騷必爆。於是展開死𦧲癡纏功，終於搞掂。
　　
但搞掂之前，講都唔信，足足要N咁多晚陪歌星到海灘及大自然環境中睇星星，以證明自己誠意十足，終才打動芳心。