【曾智华专栏】火速弹开

江湖之内，乜人都有，尤其涉及名利的商界及政界圈子。
　　
所有江湖中的顶级人物，必定知道自己身价，故凡到任何场合，尤其乜乜物物酒会，「正常地」必有三九唔识七者，想撞埋嚟揽住影张相，然后四围招摇——喂喂，你睇，我同诚哥好熟㗎！
　　
可是全部有头有面人物皆非懵人，点会咁易畀你借个膊头揿？儍的吗？
　　
很久很久以前，小弟认识的高官及大议员（当时未有普选，唔兴亲民）个个身娇肉贵，阶级观念浓厚，故此凡出席任何公开场合，一定部署三五个随从，做乜？专做挡驾。
　　
你想博懵埋身影相？好⋯⋯难嘞。
　　
后来香港日渐民主化，再唔可以摆官威或扮政治大佬大姐，咁点呢？随从一样有，但不能太明显拒人于千里之外。故此，「主角」必须自己识得执生，尤其女性，例如邓莲如或陈方安生，当年万计咁多「街佬」想在鸡尾酒会之类场合杀埋去黐张相，咁点呢？犀利，佢哋身边人及自己个个一眼关七，你未埋到两米范围，「主角」必早已闪身走咗。呢套功力，个个有！
　　
拉返到今天，讲吓立法会，突然出咗几十个无名无姓新丁议员，全部想博上位曝光，咁点呢？易！一见局长高官接受访问，佢哋就黐埋去后面做「布景板」。
　　
此外，搞掂小小事就大大声四围嗌——成功争取、成功争取！
　　
大家咪笑佢哋，政圈就是如此，若你唔寸土必争，真系鬼知你系边个？
　　
不过，立法会也有「阶级」之分，资深议员最大避忌为被新丁议员拉住影相，抽水见报。
　　
所以，个别老江湖议员同我讲：「碌Sir，行行都讲卡士，议员也如是，点可以成日同唔够班者一齐曝光㗎，故此，应闪则闪！」