【曾智华专栏】超笋消费体验

人人话日日通胀飞升，乜都贵晒，有如上世纪七十年代许冠杰的Hit爆经典歌《加价热潮》，总之乜都加加加！

系真唔系真？Yes And No！有啲嘢的确不停价格上升，但有啲嘢又确比几年前平咗，又甚或冇加价㖞。

举例——楼、股票、报章、衣着、小巴牌、串流电影平台……呢呢，前日我又遇上一个超级消费体验，真系唔知点解会咁笋。

我一星期总有一两日去睇长者早场，指定地点为荷里活广场，因消费一百元，有三个钟免费泊车！一百元，真系容乜易花吖。电影门票二十五大元，通常睇完戏，到任何一家超市或连锁药房万宁执三两件货，总之凑够一百元就掂，然后即去服务处盖印，换免费泊车。

哈，日前有奇遇！入到万宁大药房，随手攞咗盒染发素，孖装八十五元九角，再加一包三支装牙刷，十七元，咁就过一百元啦。

畀钱时，收银姐姐话：「先生，今日若果你买任何三件产品，总之够一百元，就送李锦记旧装特级蠔油呀，执多件啦，一蚊都得㗎喇！」吓，笋成咁？家中不停用呢只蠔油，故此，知道每瓶公价二十六元八角。咦……刚才买的染发素及牙刷已经是特价，平咗。如今买一百元，再送二十几蚊，咪即系总数平过七五折？

玩咗一朝，泊三个小时车，睇咗场电影，加消费一百元有染发素孖装、三支牙刷，再嚟一支旧装蠔油，共付约一百三十元。

喂喂，是否笋到难以想像呢？究竟呢家连锁药房条数点计嘅呢？搞到我以为入咗时光隧道，返咗去上世纪七十、八十年代。

小弟并非悭家一族，都几喜欢使钱又好少计「婆仔数」。但若以上平成咁的消费体验，也真系会成朝都阴阴嘴笑，因为好似突然中奖咁开心囉，感觉好正。