【曾智华专栏】徒弟送师傅过终点

本栏马迷读者，应该记得去季中，小弟已提出一个理论——师傅送徒弟到终点，造就佢成为冠军练马师！
　　
讲边两个？师傅正是蔡约翰，徒弟则是罗富全。两人过去十年合作无间，感情非比寻常。
　　
我成日讲笑，香港马圈有个「蔡氏宗亲会」，意指蔡约翰影响力所及，唔讲得笑。神仙蔡到港之后，已经赢得十一次练马师冠军，真系食生菜咁食，原因练马功力大超班外，犀利子弹源源不绝。马主买马可出天文价钱，而代神仙蔡寻找靓马的代理人背景强劲，线路纵横，加加埋埋，赢冠军真的「依丝执」。
　　
去年小弟分析，佢应该系时候益下徒弟仔嘞，故此沿途负责「护送」，自己赢勒住勒住，绝不超前，但又要「扮」在竞争，好搞笑。结果睇住第三位的告东尼冇得争后，立即「收缰」，八十四场W冚旗，而徒弟罗富全则风风光光以九十W「大胜」，师傅摆明送一程。
　　
好啦，今季嘞，蔡约翰年纪唔细，已经六十八，季尾变六十九，相信由马会到马迷都想佢留低，咁⋯⋯可能又要「搬龙门」！点搞？一于七十岁前再连𡁻两届冠军练马师啦！
　　
故此，今季又「去马」！理所当然，罗富全不但不会阻头阻势，反之投桃报李，负责护送。至今神仙已赢三十四场，徒弟三十二场，最重要「阻住」吕健威、告东尼及沈集成，冇得逼近。未来日子，必定精采，因以上三位为乜要卖你帐？四月入直路就埋身肉搏！
　　
不过，我肯定蔡约翰无惊无险又冠军，因仲有好多「秘密武器」未亮出也。
　　
明天戏码麻麻，只有一场二班赛，出八只，当中有一匹从未试过减分的马「东方飞影」，配高手布文，好，就买佢！