【阿浓专栏】「点解你咁傻！」

阿灵和阿珠的对话：

灵：猪仔包，拣定未？

珠：拣乜嘢？

灵：老公。

珠：拣定啦！

灵：边个？

珠：邝世杰。

灵：点解你咁傻！我有冇听错？

珠：有乜唔妥？

灵：点解唔系文志强？

珠：点解要系佢？

灵：阿强学历高，做紧见习律师；阿杰工业学院毕业，电工。

珠：都系一份工。

灵：阿强有车有楼，阿杰跟阿爸阿妈住公屋。

珠：我都系住公屋，有乜问题？

灵：阿强单身寡仔，可以享受二人世界。

珠：结婚之后我哋会搬出去住。

灵：阿强靓仔啲，阿杰好普通。

珠：靓仔盏令人担心，我都好普通。

灵：咁你钟意阿杰啲乜嘢？

珠：钟意就系钟意，唔使样样秤过。

灵：你呢啲叫盲目的爱情。

珠：我愿意博一铺。

灵：佢系唔系好爱你？

珠：有人追紧佢，样样都比我好，但系佢拣我。

灵：点解佢咁傻？

珠：或者我哋傻对傻。

灵：祝你哋傻人有傻福！