AI又又又大爆炸？ | 莫灝楠

今次 AI 股調整，唔係需求突然消失，而係市場擔心一堆算力公司出現融資問題。Broadcom陳福陽、Intel陳立武等公開討論 AI 融資問題後，市場焦點由「買增長」轉去「邊個借得起、還得起」。 Neocloud 公司融資成本已經極高。以 CoreWeave（CRWV） 為例，公開高級債票面約 9.6–9.8%，二級市場孳息一度近 15%。票面利息同實際再融資成本已經脫節。

AI 基建吸走credit market資金。發債量急增，推高credit spread，亦間接拉高風險定價，令整體融資環境更緊。風險資產要求更高補償，再融資窗口收窄。

業績增長仍然存在，而且部分公司backlog仍然厚。但如果融資渠道減少、成本長期企高，CAPEX指引隨時被下修，甚至合約承諾難以及時兌現。增長故事要靠持續燒錢撐住，錢貴就變成最大變數。

市場開始擔心資金鏈出現缺口。硬件訂單、數據中心進度同客戶付款節奏有如果出現問題，AI硬件股就容易變成value trap：帳面增長仍在，現金流同估值卻同時承壓。

本來喺高利率環境下，股市資金更傾向湧入「預期回報／業績確定性較高」嘅板塊，例如AI硬件同網絡安全等等。問題係倉位已經過度集中。一旦風險偏好轉弱，避險資金下一步去邊，市場本身都未有清晰答案。

Fund flow 已見到資金流入 Staples、Utility、Energy、Healthcare等等防守型比較高嘅sector，理論上短線避險可以引發一波相對升浪。但呢啲板塊本來估值唔低、波幅細，再疊加 risk-free rate 高，risk／reward 唔夠水位。好多美國 staple股股息只約2%，但10年美債都有5厘樓上，即係買收息股未必夠水位補償機會成本。

結論：喺融資成本未回落、CAPEX 兌現仍未明朗之前，寧願提高現金比重。保留彈藥等估值同融資條件同時改善，好過喺高集中、高槓桿主題硬接回調。Draw down係痛，係唔開心，但都要局減。

元宇證券基金經理

莫灝楠