券商下半年業績勢放緩｜唐牛

證監會最新發表證券業財務回顧報告，今年上半年錄得穩健增長，淨利潤增長21%至517億元。當中又以規模屬中型的B組經紀行表現最好，盈利急升37%至128億元，小型經紀行（即C組）盈利則升24%至45億元。

回帶睇番上半年港股，熱炒板塊多多，尤以AI股份最勁，大家還記得智譜（2513）股價一度逼近3,000元的日子嗎？建滔孖寶喪炒亦是一時佳話。還有新股市場，較招股價升幾倍的IPO比比皆是，超額認購倍數幾千、甚至過萬倍的情況下，不停做好事都未必抽中一手。旺市同步帶動成交造好，上半年每日平均成交額達2,830億元，證券行賺大錢變得理所當然。

不過講到尾，玩開港股都知，一年只有一兩段時間特別好炒，其餘時間都係等運到，所以可以預期，證券行下半年業績肯定會放緩，想再賺大錢嘛，唯有期望明年了。