上市公司出事 政府救邊個｜曾智華

我越來越少投資股票，因一動不如一靜，除非見到罕有的機會出現（一年可能冇一次），否則，忍手，將錢先泊在定期等。不少賭性極重朋友，則總覺唔買會身痕，所以不會忍，寧願亂入市，結果？

當機會未出現，又或形勢混亂時，最佳策略是聽李澤鉅口訣——睇唔通，咪亂衝。唔衝，最多蝕少少通脹，但安全。亂衝？分分鐘命都冇，尤其退休一族，更要切戒！

前晚與一位智者摸酒杯底，講到買股票之道。佢話：「碌sir，我百分百認同你買股票前，必先要過十關，若過不到五關，一定要忍手，因蝕本機會絕大！」

邊十關？長期讀者應早領略。若忘記咗，大家試試上網搵啦，我唔再重複又重複嘞。

智者繼續：「最贊成你的一點，屬重中之重，為——政府唔俾得佢死！因佢死，政府將會慘過佢，所以一定救！」

咁，救邊間唔救邊間？小投資者必須學習這種分析能力。舉例，銀行有數十間，邊間出事？政府必須救；而邊間出事，則會「交返俾市場」處理唔沾手呢？咁淺，答中冇獎！

智者間中開投資班，其中要求學生做的功課，正是假設自己是中國政府，若遇上金融風暴，在涉及民生範圍的界別中，會決定率先救邊間公司呢？

如今國內上市公司千千聲，各個領域皆充斥質素不同的，若果你能準確估計那間公司出事時政府必救，等於肯定那間公司不但不會死，更可能在設計政策時，「錫晒」佢。

以香港為例，就是國泰航空（293）及港交所（388），你的投資組合冇佢哋，係咪有點傻傻哋呢？（當然睇價位入啦！）

回說智者要求學生做功課，是估計金融災難時，以下行業中政府會救的公司：醫療、交通、能源、銀行、通訊、電車、科技、藥物、化學、物流、電力、旅遊、建材、礦產……

智者指出，某些行業，政府根本不會救，因不需救。但與民生息息相關的，則會選一間去救而放棄其他。2008年金融海嘯，美國政府救銀行，正是如此。

資深傳媒人 曾智華