明知无人查嘅报告，你会几认真去做？｜林一一

上星期五夜晚9点几，一个做细价股嘅CFO打电话畀我。佢间公司市值7亿零，主业机电工程，主要地盘散落喺大湾区，公司嘅ESG事务由marketing manager兼任，「想问下，我哋公司系咪迟早都要做鉴证？我听人讲成本都几贵，分分钟费用要加几成。」

我谂咗两秒，答佢：「唔使，起码喺可见将来，唔使。」电话𠮶边「哈哈
笑咗声，语气即刻轻松晒。我收咗线之后喺房思考咗一阵，因为呢句「唔使」，就系我上一篇文想讲嘅结局（AI大幅降低写报告嘅成本，如果连鉴证都唔使做，根本无办法判断报告好坏）。

答案一早喺度，系我唔想承认

上一篇我写，AI令「写」报告变到近乎免费，剩返仲有价值嘅系「查」——有人肯睇原始数据、肯签名、肯喺出事𠮶日孭飞。我文末写咗一句：查得狠啲嘅成本，喺细价股身上不成比例咁重，而香港大部分发行人都系细价股，呢个死结我之前未有答案。宜家唔使谂啦，官方有答案。

会财局旧年年底出咗份咨询文件，讲香港应该点样监管可持续汇报鉴证。3月30号截止收意见，我执笔𠮶日仲未见到咨询总结出街。份文件写得几扎实，方向亦都啱：分两阶段，第一阶段先查范围一同范围二嘅温室气体排放，第二阶段再扩展到其余强制披露，而且两个阶段都只要求「有限度鉴证」，冇一步登天要求核数师级数嘅保证。时间表大概系香港准则（Hong Kong Standard）新规例全面采用之后第3年同第5年，即系大约2030同2032财年。

问题唔系时间或者执行标准，而系覆蓋范围。呢套强制鉴证要求，跟嘅系恒生综合大型股指数成分股，总数109间；香港有大约2,600间上市公司，即系4%。

死结唔系解开咗，系绕过咗

我上篇担心嘅系「细价股畀唔起钱做鉴证」。官方制度提供嘅解决方法系，唔使佢哋做。其实技术上完全合理。有限度鉴证嘅收费，粗略估计大概系核数费用嘅一成、两成左右，合理保证更加夸张，可以超过四成。一间市值7亿、核数费唔使1球嘅公司，你叫佢每年再拎多几万出嚟查啲电费单、水费单，佢真系会问你「查嚟做乜」。监管唔想压死细价股，人之常情，亦系施政现实。

但你将呢个决定，同我上一篇嘅结论叠埋一齐睇，就会见到令人惊讶嘅后果：香港96%嘅上市公司，佢哋嘅可持续发展披露，将会系「无独立验证既机械式写作」。

写嘅方面公司已经无需投入资源（AI令人人交到一级荣誉），查证方面唔会有结果（制度明文只查香港整体4%）。两方面夹埋，剩返嘅系一份每年准时出、格式齐全、冇人写得辛苦、亦都冇人查嘅文件。

我唔系话呢批公司会集体讲大话。而系就算佢真系做得好，都冇任何机制证明到佢做得好。而系一个冇证明机制嘅市场，做得好同做得差，价值一样。呢个先系死结嘅真身。唔系「畀唔起钱」，系「唔使查证」变咗默认值，然后所有人都若无其事咁继续行礼如仪。

一个信号要成立，系佢有几难扮

要讲清楚点解「唔查」咁致命，就要搬Michael Spence出嚟。佢1973年写𠮶篇讲学历信号嘅论文，攞咗诺贝尔奖。史宾斯讲嘅唔系「读书叻嘅人有文凭」。佢讲嘅系一个信号要有用，佢嘅成本必须同发讯者嘅质素成反比。叻嘅人可以入到大学拎文凭，唔叻嘅人挨完公开考试入唔到大学。正正因为呢个成本差，张沙纸先至有价值。一旦公开考试变到人人拎到高分，张纸就唔系变得冇咁值钱，而系彻底冇咗价值。

AI拆咗「写」𠮶边嘅成本差，本来仲有机会喺「查」𠮶边重新建返一个成本差：对扮做嘅公司贵。一间有电表纪录、有单、有系统嘅公司，畀人查系麻烦但会成功过渡；一间乜都冇、靠估、靠蒙混过关嘅公司，畀人查系灾难。呢个成本差，系AI抄唔到嘅，佢系整个披露制度剩返嘅最后一个地基。然后呢个地基，得百分之四嘅公司用。

「唔查」同「全部查」明明仲有好多格

讲到呢度，又会有人问：「咁你想点？叫2500间细价股每年畀多十万、八万做鉴证？你上篇先话合规负担压死细价股。」呢个系假两难。而拆佢，经济学有现成工具。

第一，最好嘅查法从来都唔系查晒。Robert Townsend于1979年有篇好经典嘅论文，讲「昂贵状态验证」：当你要验证对方讲嘅嘢系咪真，而验证本身好贵𠮶阵，最好嘅做法系点？答案唔系「每次都查」，亦唔系「唔查」，而系随机抽查加惩罚机制。威慑力系「被查中嘅机率」乘「被查中嘅代价」，要令更多公司愿意正视时间严重性，你唔需要提高被查中嘅机率，只需要提高个代价。

呢个唔系理论空谈，系全世界税局日日喺度用嘅嘢。税局冇查你每一张单，但你照样唔敢报少。所以真正应该问嘅问题唔系「2,600百间点样全部查」，而系「每年抽50间，抽中咗认真查，有做假就重罚」。前者系一个预算问题，后者系一个设计问题。而我哋成日将设计问题误当成预算问题，然后宣布做唔到。

香港最钟意嘅两个字：豁免

我对监管冇恶意，会财局份文件系我近年见过最有诚意嘅一份。但香港有一个好深嘅政策肌肉记忆：一遇到「中小企负担」，答案永远系豁免同分阶段。点解？因为豁免系全世界最平嘅政策。佢唔使钱、唔使请人、唔使得罪任何人，而且卖相好好：你可以开记者会话「我哋充分考虑咗中小企嘅承受能力」。冇人会出嚟反对。

但豁免有个副作用，你等于用政策公开宣布咗，呢批公司嘅披露唔重要。如果佢真系唔重要，咁就唔好叫佢每年出。而家系，你一方面叫2,500间公司每年准时交，一方面制度上明讲唔会查佢，呢个组合造就咗一种荒谬，所有成本照比，但所有价值一律归零。

至于分阶段，到2032年，AI已经帮全香港写咗好几年报告。我哋会喺一个所有人都考到大学嘅世界，开始为4%嘅人设立小圈子考试。

我知官方嘅回应会系咩：先做大股，累积经验，再慢慢扩阔范围。呢个系稳阵做法，我甚至同意佢喺行政上系唯一可行嘅做法。我唯一嘅不安系，我哋成日以为时间会等我哋，但写作成本归零呢件事，系一次性、不可逆、而且已经发生紧。

上篇文我写过，我攞咗AI用40分钟出𠮶份报告，同我团队做咗3个礼拜𠮶份，摆埋一齐畀两个同行盲睇，两个都拣错。我当时最唔舒服𠮶下，系我自己都要开后台睇档案名先分得出。有读者问我咁点算？我而家嘅答案系唔再完整读完成本报告，而系净系查阅已经验证嘅数据同资料，喺唔同同业嘅披露数据中，寻找差异。

𠮶个CFO寻日再WhatsApp我，问我下年可唔可以帮佢悭返顾问费，用AI出报告就算。其实佢冇讲错，喺一个唔会有人查佢嘅制度入面，佢做嘅的确系降低成本嘅理性选择。唔理性𠮶个，系要求佢继续交唔需要验证报告既监管机构。

咁样讲，系咪姐系已经无晒公司会分配更多资源做ESG相关既Disclosure同strategic planning？过百万嘅Quotation继续出紧，但呢批公司面对紧嘅又系另一种问题。下篇再续。

林一一