唔快乐唔快活｜曾智华

老友肥H，专买家传户晓集团的餐饮股票，认为自己熟悉其品牌，兼可以亲身光顾，掌握业务旺淡。多年来，一直揸住多只香港人个个熟悉的餐饮股：（一）大快活（052）；（二）大家乐（341）；（三）稻香集团（573）；（四）富临集团（1443）；（五）龙皇集团（8493）。

除大快活及大家乐，全部已变毫子股及仙士股，喊到收唔到声。

一字记之曰——斩

早在十年前，我已忠告佢切勿揸中式餐饮股，因饮食业龙蛇混杂，大量人透过不同手法掠水（我知，因算做过吓！）。另外，餐饮业员工入行门槛低，故由管理到前线员工，皆良莠不齐。

个个集团上市前，皆有公关专家塑做形象，始创者给人一副努力奋斗终挨出头形象。可惜，全部止于此。一旦成功上市，不少本来优良的管理立时跌watt，由外壳烂入心，自然反映在股价，如今冇乜机会翻身了。

肥H揸到成手难再见家乡股票，问我点？一字记之曰——斩！冇眼睇，不回头！

但佢深深不忿，因日日帮衬大家乐大快活，但见生意不俗，背后的罗氏家族是正派商人，应会努力交代自己，交代品牌的。

「肥H，对，罗氏乃香港传统名门，经营生意必不会蛊蛊惑惑。但大势所趋，你想大快活重见40元（上市高位）及大家乐重见30元（上市高位）？唉……已没可能了。如今一只5.6元、一只7元，揸住当然唔快活，也唔快乐。睇图表，两间公司的股价，皆由2016年高位不停下泻，下降轨明显又坚实，好难有机会反弹。

另外，数字会说话，两个集团无论如何努力经营，仍须面对三座难以跨越的大山，包括：人工、原料、租金。三者之中，最恶搞为人工，年年不断升，只有增冇得减。

睇完两大集团刚刚发表的业绩报告，相信任何股东都会泄气。因所获的利润除以分店总数目，大家乐每店每月只赚11.5万元。大快活更冇味，只得4.3万元！总结，咁奀，仲做嚟为乜？揸住佢地股票，又点可以快乐快活呢？

资深传媒人曾智华