古天后日志｜港股高位反复 现水平值博率有限

6月7日，多云，有骤雨及狂风雷暴，早上雨势有时颇大。隔晚美股先升后回，早段三大指数表现唔错，但喺10年期美债息重上3%下，升幅缩水，市场资金再度变得保守，最终三大指数升幅水瓜打狗，唔见一大截，道指升幅仅余16点；标指跟纳指分别升12点及48点。

大魔又嚟魔笛追魂，其首席美股策略师威尔逊指，企业疲弱嘅盈利指引为拖累美股嘅最新因素，股价短期内或于目前水平徘徊，直至第二季业绩期来临，股价根据业绩表现再跌或见底。佢更预期，标指将于8月中后期贴近3400点水平，即系相对隔晚收市价4121点再跌超过一成。

美汇指数走强不利股市

不过美国投资者又唔系一面倒睇淡，高盛首席经济学家哈哲思相信，劳工市场出现回软迹象，通胀亦渐见缓和，经济仍朝向「狭窄的软着陆道路上。」但市场已预期美国联储局喺未来两次仍要加息半厘，10年债息回升。而美国商品期货交易委员会(CFTC)数据显示，对冲基金正沽空美国国债，5月底杠杆基金嘅10年期美国国债期货录净淡仓，为自2021年1月以来首次，意味对冲基金押注孳息率走势将向上。另一方面，美汇指数再度走强，对股市嚟讲唔系好事。

至于港股㖊日喺成交略为增加至1385亿下挟升571点，不过咁嘅升幅唔够1400亿成交，其实市场肯追货嘅资金有限。虽然唔少好友认为大市呢转反弹可以挟升至22000至22500水平，但为咗呢一千几百点去追货，值博率有限。尤其美股𠮶边摇摇欲坠，有乜冬瓜豆腐，任凭阿爷再出招护航，港股跟内地股市唔跟住美股插水已属万幸，实在好难寄望喺现水平追货会有可观回报。反正大市走势仍然反复，要买货都等调整𠮶阵，乜嘢水平先叫抵博，古天后就认为短炒可以参考恒指保力加通道，至少回到日线中轴，即系大约20500点水平，先再考虑入场。

古天后

(徐狄怡，证监会持牌人)