鍾嘉欣宣佈明年3月首登紅館終圓夢 親認嘉賓有經歷「管家仔」林峯呼聲最高？ 粉絲反擊唔夠歌指控
人氣女神鍾嘉欣（Linda）自2008年正式以歌手身份出道，推出過多張專輯，並主唱過不少膾炙人口的劇集歌曲。相隔多年，粉絲們引頸以待的好消息終於來臨。鍾嘉欣昨日（20日）在社交平台正式宣布，將於明年3月首次登上紅館，舉行一場個人演唱會，實現她多年的夢想。鍾嘉欣同步公開的演唱會海報，今次造型美侖美奐，盡顯高貴氣質，十分吸睛，讓人眼前一亮，也令歌迷對演唱會的期待值推至最高。
鍾嘉欣今日（21日）回覆《星島頭條》表示先要多謝大家的祝福，自己知道能在紅館開騷是超級開心的事：「同埋真係願望成真，除咗係我嘅願望，亦都係我啲歌迷同埋支持咗我咁多年嘅朋友、觀眾嘅夢想嚟。」鍾嘉欣坦言從23歲開始做歌手，出第一首歌和唱片後，都知道好多人很支持自己，所以一直好希望回港開騷：「終於可以返到嚟，我到時會好好enjoy the show。呢個係一個見返好多舊朋友、陪住我成長嘅朋友嘅show嚟嘅，所以我會好俾心機，會係一個全新run down。我好落力，已經成日都開會，所以一定會係一個好銘記於心，希望大家支持啦！」
鍾嘉欣嘉賓人選大賣關子
問到會否請「管家仔」林峯任嘉賓？鍾嘉欣表示12月會開記者會公布消息和詳情：「嘉賓嗰方面，我一定會搵一啲我自己好鍾意，亦都同我有經歷嘅，我相信大家會好鍾意睇到嘅人，會喺台度同我一齊表演，真係好多謝大家對我嘅支持同祝福，好希望大家都有機會嚟睇我嘅騷，其實我每一場演唱會，都好希望可以發放正能量同愛光俾大家，多謝你哋！」昨日鍾嘉欣在馬來西亞出席第5屆《The Knights Award》頒獎典禮，並奪得「年度多棲演藝標誌性人物」獎，鍾嘉欣表示非常榮幸得到這個獎，坦言自婚後已8年沒去過當地，過往除了香港之外去得最多就是馬來西亞，所以與當地的粉絲也建立了像家人般的關係：「今次見返佢哋好開心，以前淨係忙住工作，一到步就即刻做嘢，冇行過街。所以我除咗做嘢、攞獎之外，今次呢個旅程爭取咗去玩，去享受呢一個咁美麗嘅馬來西亞，所以好開心，終於有機會去了解一下馬來西亞係一個咩地方。」
鍾嘉欣感動表示「為你而開」
鍾嘉欣在帖文中難掩興奮之情，以「香港，我回家了」為題，寫道：「我一直夢想著這一刻，而今天，我終於可以說出來……這場演唱會，是為你而開。」她表示，能夠回到香港開唱是夢想成真，對此感到非常開心和感動。她承諾會為粉絲們帶來一場充滿心思、全新編排的精彩表演，與大家一起回憶過去的美好時光，並送上祝福和新歌。消息一出，大批網民和粉絲紛紛留言表示「終於等到了！」、「等足咁多年！」。對於坊間有聲音質疑鍾嘉欣「唔夠歌」開紅館演唱會，不少粉絲挺身反擊，指出她其實擁有大量經典金曲，如《一人晚餐》、《其實我不快樂》、《日夜想你》、《最幸福的事》等，每一首都深入民心，絕對能掀起全場的「回憶殺」。此外，更有不少劇迷希望她能邀請經典螢幕情侶「管家仔」林峯擔任嘉賓，重現經典，如果成事，相信必定能將演唱會氣氛推向最高潮。