袁文傑自爆主動改簽「一年一騷」 面對前輩離世病重傷感 撐周嘉洛回《三代同糖》救亡

袁文傑飾演《愛·回家之開心速遞》潮偉再度走紅，今日（10月10日）他受訪時大爆自己已經改簽「一年一騷」合約，即從經理人合約變回按工作計算的部頭約。袁文傑在訪問中突然傷感，表示想起早年「已離開」的朋友和前輩，說：「我哋成日得個講字，但係都冇探到。例如，早兩日先探完我訓練班傅月美老師，佢突然間中風。佢同我講King Sir（鍾景輝）走咗好傷心。想去探Ming Sir（李銘森），Ming Sir又已經昏迷緊。我覺得講咩都好，想做就去做。」

袁文傑孖陶大宇、黎耀祥、吳啟華直播帶貨

他坦言，《愛·回家之開心速遞》之後終於可以慢下來享受生活，最近更迷上了沖咖啡。他表示，最近與陶大宇、黎耀祥、吳啟華等人一齊直播帶貨，一次開播就講足幾小時，坦言幸好有直播講波的經歷。「我覺得係鬥志上嘅磨練！」講《愛》停播後，眾演員去向成為焦點，他大爆自己轉簽一年一騷消息。「實不相暪，我舊年已經同TVB改咗合約，係我自己要求。一騷好啦，我想早啲放返個心出嚟，我都同珍姐咁講。」他說，就算已經改約，但當時珍姐仍然叫他繼續拍攝《愛·回家之開心速遞》，他表示十分感恩。袁文傑表示改約是為了跳出舒適圈，又透露：「話同我續多兩年，薪金都冇乜調整。好fit，如果肯嘅留喺舒適圈都得。」坦言想試更多可同工作。

袁文傑讚周嘉洛是「天才型」

提到《愛·回家之三代同糖》收視告急，傳出搵舊班底救亡。如果TVB搵他繼續做「潮偉」，他就說：「搵返嘉洛嗰啲啦，佢當打嘛。」更大讚他是「天才型」。不過，他也指不能將一套播了10年和一套新劇比較，說：「點比呢，你又唔能夠搵到梁朝偉返嚟，最多搵我呢個潮偉啫，哈哈。」提到有傳吳若希會被淡化再離開劇組。袁文傑說：「做人做到咁真係，去到邊都係一個焦點！」