梁詠琪自爆出道「未執好」變靚過程 獨遊西班牙結識老公認定真命天子丨一周星星
梁詠琪（Gigi）將於今年11月再踏紅館舉行《梁詠琪 LOVE GiGi愛自己世界巡迴演唱會—香港站》，最近頻頻現身為演唱會進行宣傳。昨晚（4日）播出的節目《一周星星》，梁詠琪接受主持許文軒訪問，毫無包袱地分享入行初期的「變靚」過程，以及與西班牙籍老公Sergio相識經過，還有誕下女兒後曾一度腫得似氣球。
梁詠琪「整咗兩樣」
梁詠琪入行30年，外表十年如一日凍齡，許文軒在訪問中發現梁詠琪臉上缺少初入行時的癦。梁詠琪聞言隨即大笑，驚嘆許文軒的觀察力強，並大方承認：「我有脫過癦，不過佢生番出嚟，但冇咁深色，嗰時公司呢會帶我去箍牙同脫癦。因為我啱啱出道係乜都未執，即係一個學生傻吓傻吓，咁話『有癦脫咗佢、乾淨啲，牙又箍下』，係整咗呢兩樣啫。」
梁詠琪搵許茹芸把關
梁詠琪提到老公及女兒時，甜笑分享與西班牙籍老公Sergio 的浪漫邂逅與相處點滴。梁詠琪回憶起當初開完演唱會放假，想搵人陪自己去旅行卻碰壁，最終梁詠琪決定獨遊沒有去過的西班牙，並在朋友介紹朋友之下，再透過對方認識Sergio。梁詠琪坦言當時兩人喝一杯酒、聊聊天，就覺得老公非常真誠，加上對方夠高，與自己的身高好合襯，而留下好印象。
梁詠琪直言：「佢又好高啦，你知啲高妹好難識到好高嘅男仔，我對佢嘅印象幾好。之後我哋再相處咗兩天，佢帶我去玩，我就覺得好似真係呢個人喎，好係呀！（認識）幾日，我又唔係好肯定，但又好似係（真命天子）喎，要搵多個人幫我望吓先得。」最終梁詠琪急召閨密許茹芸幫忙把關，而梁詠琪當時已篤定真命天子是Sergio。
梁詠琪因老公心態轉變
梁詠琪婚後與老公Sergio返港，初次以夫妻身份面對傳媒，梁詠琪坦言被追訪時感到非常焦慮。在步出機場前，甚至緊張地跟老公表示不要有親密舉動，深怕媒體會亂寫。但Sergio令到梁詠琪有所改變：「我記得行出去之前，佢好輕描淡寫咁望住我雙眼，好真誠咁樣同我講，叫我微笑。」梁詠琪當時戰戰兢兢讓大家拍照，然後上車。
梁詠琪與Sergio婚後曾被傳媒追訪、偷拍，梁詠琪舉例食飯時被拍會想逃避離開，但老公釋放出正能量：「佢會捉住我隻手，佢好成熟同我分析，我哋結咗婚，我哋係夫妻，我哋食飯，就算俾人影到，只要係相處愉快，釋放一個好正面嘅Energy（能量），係唔會寫得唔好㗎！」漸漸梁詠琪發現報道幾好，好像有改善，令她心態轉變。梁詠琪又提到自己並非一成不變，在生完女兒後曾經歷人生中身形最「圓潤」的時期，當時因為餵母乳，整個人都很多水分，腫得像氣球一樣。