前港姐曾瑞珊割肠救子 罕病儿曾做8次大手术 移台生活离婚拟复出 与陈茵媺同届选美
曾瑞珊曾在2006年与陈茵媺、周家蔚及吕慧仪同届参选香港小姐，落选后曾在娱乐圈短暂发展，其后毅然决定转行、回归家庭并育有一对子女。然而，她的生活迎来了极大挑战，因为她的大儿子甘珞龙（甘甘）一出生便被诊断患有罕见病「短肠症」，出生仅3天就因「扭肠」而必须接受紧急手术，在6岁前便经历了高达6次大手术。多年来，甘甘都无法像一般人一样用口进食，日常生活完全依赖静脉输注机输入营养液来维持生命。
曾瑞珊割肠救子重新出发
曾瑞珊其后举家移居台湾。2024年，曾瑞珊捐出小肠给儿子并在台湾接受「活体小肠移植」手术，她形容该手术是「打大佬」级别。在今年的中秋节，甘珞龙因为肠道出血入院「维修」（接受治疗），她坦言每一次出现状况，作为妈妈，心里还是会担心，幸好住院一个多星期终于可以回家：「没有甚么比『可以回家』更值得感恩。」曾瑞珊早前接受梁靖琪的《Tea Talk with Toby》访问，透露自己原来已经离婚并重新出发，她坦言仍然很喜欢演戏，对演艺事业仍有期望。
梁靖琪赞曾瑞珊学懂爱自己
梁靖琪在IG贴上与曾瑞珊的访问片段并说：「佢同我好姊妹Janet识咗20年，佢哋当年一齐选港姐，边个会估到之后条路系咁行？2012年佢个仔仔甘珞龙（Credus）出世，第三日就发现唔肯食嘢。拖咗几日，有个资深护士望一望，即刻话唔对路。上到儿童病房，见到张纸写住『坏死性肠炎后遗症』，佢成个人癫咗。之后三个医生、十几个护士围住张床仔，佢话个仔插满晒喉。佢同自己讲：唔可以喊，唔可以跌低。佢学识将情绪shut down，唔系唔爱，而系唔可以畀情绪带住走。」Credus前前后后做了8个大手术：「仲未计无数细嘅。佢曾经觉得自己唔系一个妈妈，唔敢抱佢，冇喂过人奶，觉得自己冇用。但就系喺𠮶个位，佢学识咗『爱自己』。唔系出街买件衫咁简单，而系真正相信，你唔净系『边个嘅阿妈』，你系『你』。六年前移民台湾，离咗婚，重新出发。妹妹出世，健康快乐，仲天生好保护哥哥。呢个就系上天送畀佢嘅礼物。珊珊而家仲系好钟意演戏，对演艺事业仲有期望。唔会再将自己收埋。不要怕，只要信。好多嘢都系因为恐惧而令你唔够胆向前。将恐惧摆低，只要你相信，未来就会系好光嘅。」
曾瑞珊强忍悲伤陪甘甘打针
在访问上，谈到当年移居台湾的原因，曾瑞珊说：「喺𠮶边有一位非常之劲嘅医生，专门我仔仔呢个病嘅科目啦，系比较最专门嘅。当年点解我识佢呢，就系经历咗咁多嘢嘛，有时有啲嘢你唔系斋讲畀某一个人听你就会舒服嘅，同埋你要揾啱人讲呢，其实都系一个好难嘅课题嚟嘅。而家谂返转头，其实我当时都几恐怖，系冇咗呢个情感呢个嘢。但系，我都觉得我做得啱囉，因为我冇将个情感摆喺first嘅时候，我冇跌一个情绪。我有谂过不如同我仔离开算，真系好辛苦，我见到佢嘅辛苦。同埋你因为喺个医院度，你会经历好多啲，你想想像唔到，但系其实非常之痛苦嘅嘢，譬如我仔打针，因为可能佢由细到大打太多针，佢啲血管已经收埋晒，所以佢每次帮佢打『留置针』（插豆）呢，系每次都要插九下，插完呢度唔得，掹返出嚟，插另一只手，插到佢手手脚脚全部瘀晒。即系你呢个moment，但你唔可以喊㖞，你唔可以闹人㖞，因为，如果你只要一刻个医生觉得你控制唔到情绪，你以后都唔使再同你个仔一齐入去𠮶间房度喇。佢每次如果入去嘅时候，你就要离开喇，喺𠮶个moment，我系可以陪住，或者抱住佢一齐入𠮶间房，佢哋去同佢处理嘢嘅时候，因为点解？我够冷静。但其实我入面已经癫紧，我系控制住自己。我自己都同自己讲：『好啦，我shut down啲情感，千祈唔好喊，你要做得好好，因为你，做得好好嘅话呢，啲护士觉得你够calm呢，佢就会畀你多啲，多啲机会去融入佢哋啦。』」
曾瑞珊幼女两岁霸气护哥哥
曾瑞珊坦言女儿的到来，是上天的恩赐：「我个女女系非常之极之健康嘅，亦都好cheerful啦，非常感恩上天。佢天生就系有条nerve（神经）系好保护哥哥。佢以前有一个scene，我到而家，我个friend讲返出嚟，我哋两个都觉得真系好劲。我哋𠮶时带佢去游乐场度玩啦，𠮶度有一个area系玩车仔嘛，我个仔𠮶时已经系七岁，差唔多七岁，其实基本上系识踩，但系佢啲肌肉啊等等嘅发展唔系正常嘅小朋友，所以佢踩唔系踩得咁好，咁就有一班外国嘅小朋友啦，佢哋细个佢好明显，就踩得好好，系咁踩踩踩踩，咁佢就有啲阻住人哋。其实佢哋都唔算话好mean，但系就有些觉得：『Don’t block the road! I want to go forward!』好大声。我个女𠮶时两岁，仲真系行都仲系躝吓躝吓，佢净系指住𠮶几个人：『Don’t you talk to my brother!』佢到而家都系咁样，即系如果一有人同佢哥哥讲大声啲，佢即刻个人就会上身㗎喇，佢天生就知道哥哥系特别需要，所以佢就，好似天生会照顾哥哥。」