潘小文自爆遭恐吓报警求助 揭梅妈逾千万遗产真相 怒轰梅启明：唔好再喺度搞风搞雨
已故乐坛天后梅艳芳的母亲覃美金（梅妈）于上月底离世，丧礼亦已低调举行，曾曾指要豪花150万元帮梅妈风光大葬的梅启明，在得知母亲已被火化后，未有让梅妈「入土为安」，连日来动作多多，日前接受《星岛头条》访问时，声称自己的律师有要求姪仔律师交出遗嘱，又闹爆侄仔可恶和阴险，要「等个天嚟收佢」，甚至操纵梅妈与他脱离关系：「佢系深谋远虑，叫佢都唔睬，呢啲咩人嚟？简直系畜生！」
潘小文坦言被人恐吓已经交给警方
梅妈生前好友潘小文今日（29日）在李婉华的YouTube频道开直播，她坦言被人恐吓，但因已经交给警方，所以不方便回答太多：「最近有朋友见到佢喺我住嘅地区出现，所以都有一定程度嘅担心嘅，警察都讲咗如果我见到𠮶个男子喺我屋企附近啊，或者我工作嘅地方附近出现呢，即系我视线范围见到佢啦，都叫我即刻就报警处理。𠮶个70几岁嘅男子啦，公开话即系打我，我嘅律师都建议我去报警嘅，咁警察头先都俾咗啲指示我啦，自己出入要小心啦。」
潘小文表示因已经报警，所以未有开名，只表示是一名70多岁的男人，而且大部份时间都由李婉华开口问，潘小文说：「我唔知佢系咪踩线，总之喺我生活𠮶个区分出现，有朋友见到佢喺边度边度出现，就影啲相WhatsApp我话畀我听，我都叫做半个公众人物，佢要认我、要揾我，容乜易呀，我自己都会好小心。我成日都有谂，一波刚平，一波又起，唔知搞乜，真系好混乱。」李婉华赞潘小文处理手法很好：「佢而家个情绪好激动，随时会做出一啲过激嘅行为，佢认为大家查核咗佢承继遗产嘅事嘛，你同佢个侄仔都可能系佢眼中钉，佢已经喺个网络上面系咁讲㗎啦。」潘小文则说：「交畀警察查啦，我就觉得喺呢方面，我真系唔方便讲。头先教晒我哋已经讲晒，佢哋都教晒㗎啦，咁唔排除警方会联络相关人士，因为𠮶啲人系公开讲嘅嘛。」对于梅启明连日的行径，高调与泰籍女友坐地铁shopping，潘小文说：「佢明明话自己冇嘢做，失业㗎嘛，而家又突然间有钱使，几好啊，一个老人家有钱使，我都觉得系开心事嚟嘅，佢shopping最紧要快乐，咁你咪见到佢对住镜头嘅样同佢背后嘅样系有好大嘅对比囉，梅先生成日觉得自己系明星，佢先系明星嘛，但事实上一个小丑嘅行为都好明星嘅，呢个我唔反对嘅。」
潘小文续说：「所以梅先生对佢嘅言论都要对自己做过嘅嘢，讲过嘅嘢负责任。香港系法治嘅地方，大家就要遵守法，如果真系觉得咁有问题，你可以报警求助，或者自己用一啲法律途径去处理囉，唔系咁样喺一啲平台上面高谈阔论，又话要去伤害其他人，就唔应该，真系唔应该。咁我再讲一次，梅妈喺三年前已经出咗个声明同呢个人断绝关系㗎啦，严格嚟讲呢，阿梅妈对佢已经系恩断义绝㗎啦。但佢又频频都仍然，即系攞佢阿妈嚟去招徕，人都过咗身囉，咁所有嘢都系佢生前嘅意愿嘅时候，咁我哋都应该尊重返相关嘅决定。因为梅妈生前系讲得好清楚，系将佢所有嘢交畀侄仔处理，而唔系交畀梅启明，亦都从来冇提过梅启明三个字嘅时候，但佢就不停咁样claim自己系梅覃美金女士嘅儿子，呢个身份我都冇异议嘅，但我再讲一次，梅覃美金女士喺三年前已经同梅启明先生割断咗佢哋嘅关系，咁梅启明先生喺出面嘅花样百出呢，同梅覃美金女士都系完全冇关，希望大家都理解，接受呢一个决定。你系佢个仔，呢个系事实，但系而家梅覃美金女士已经喺三年前已经登出咗个声明同梅启明先生系已经冇关系，所以都希望梅启明先生尊重返家属嘅意愿，就唔好再喺度搞风搞雨。」
梅妈覃美金丧礼低调进行：
潘小文澄清未有向梅启明做出任何挑衅
潘小文亦称必须要澄清一件事：「我唔系要对梅启明先生做出任何嘅挑衅，但我见到佢频频就去将一啲梅覃美金嘅家事攞出嚟讨论呢，我就觉得唔系几恰当。梅覃美金女士同我都叫做有啲缘分，喺佢晚年嘅时候，成日有机会就同佢倾到好多偈，佢系成日都想有人陪佢，咁啱我又有啲时间我又可以，咪同佢倾下偈，就系咁样接咗个缘。喺佢晚年嘅时候，我真系见证住呢个老人家，晚年嘅意思即系阿梅启明先生冇喺佢身边之后，佢真系变咗一个好可爱、好友善，好慈祥嘅长者。」至于梅启明声称梅妈遗下逾千万遗产，潘小文则说：「再讲一次啊，如果根据阿梅启明先生嘅计法呢，佢话阿梅妈有过千万，系冇计错数嘅，点解呢？因为佢晚年嘅时间，二十五万一个月嘛，梅启明先生嘅计算系啱㗎，但系问题系，呢个系要阿梅妈唔食，唔饮，唔睇医生，唔出街，唔着衫，唔使交水电煤，总之所有嘢都唔使做嘅情况下，系有可能有呢个数，但系我哋都知道，阿梅妈晚年睇嘅医生系好犀利。净系医院条数，睇医生条数呢，都系一般常人能够理解到，一个老人家去到一百零二岁㖞，大佬，都要有返咁上下底气，先至可以有呢个成绩出嚟嘛。佢食嘅、着嘅、住嘅，用度都系最好嘅，有时做人嘅嘢一念天堂、一念地狱，回头是岸喇，有啲说话唔系讲吓就可以算。」