雯雯因財困陷崩潰夫妻分房瞓 《東周刊》獨家爆張致恒借財仔遭逼唱〈死性不改〉減息
現年41歲的張致恒與粉絲區燕雯（雯雯）結婚7年、4年抱4，惟婚後長期深陷嚴重財困，雯雯頻頻於社交平台公開炮轟老公兼鬧離婚，令兩人被網民封為「離婚界KOL」及「借錢界KOL」。日前，張致恒與雯雯罕有夫妻檔接受最新一期《東周刊》獨家訪問，剖白近年飽受的辛酸。
張致恒：一直諗點做個好爸爸、好丈夫
面對雯雯多次放負，外表漸見斑白滄桑的張致恒直言：「生仔後，都努力改變自己，先有個好將來。呢7年，我係有做錯嘅時候，但都一直有諗點做個好爸爸、好丈夫，但夫妻嘅磨合，真係需要時間，否則好難行落去。（太太經常放負批評？）係攰嘅，當溝通唔到，有冇諗點解唔一早離婚？但小朋友已經出世，就諗點改變去迎合個家庭。」至於雯雯坦言因懷孕結婚，但生活捉襟見肘才上網發洩，直言想離婚卻「冇能力帶走4個，惟有頂多一日得一日。」張致恒則體諒太太承受巨大公眾壓力而選擇包容，並斬釘截鐵表示絕不輕言離婚：「離婚一定唔會講，結得婚，就做好丈夫責任。有時係想放棄，好多次向耶穌祈禱帶我走，我唔想煩，要維持一個家庭係好攰。但做咗老竇，一家之主，原來係高難度。以前我鍾意飲酒，但雯雯最憎酒氣，我𠵱家連飲酒放鬆自己都唔敢。真係好多次想去自殺，但諗起小朋友，就放棄呢個念頭。」
雯雯憶最徬徨時 聞張致恒財困感崩潰
一家六口每月生活費至少3萬元，張致恒因以往負面新聞形象受挫，放低藝人光環轉做地盤及搬運，但收入仍難以應付日常開支。雯雯回憶最徬徨時：「佢一句冇錢，車費都冇，啲仔換咗校服都坐晒喺度，我真係崩潰！」陷入絕境的張致恒唯有向身邊親友借貸，借無可借之下硬著頭皮涉足旺角財務公司，豈料慘遭當場羞辱，他憶述：「第一次上財務公司，人哋一開門︰『嘩！大明星嚟借錢？』但最唔開心係，佢叫我唱〈死性不改〉，免你幾千蚊（利息）啦！被人玩嘅感受，真係好難受。事後，我冇唱但有借，我亦有去過其他財務公司，卻遭拒絕，徬徨到跪埋一邊喊，真係唔知點算？」財困消息傳出後，張致恒更遭地產公司列入黑名單，租屋屢遭逼遷：「試過租到屋，但後來業主知道租畀我，就向中介要求我哋漏夜搬走。當時，我喺內地登台，最終佢哋凌晨3、4點去咗我阿爸觀塘嗰度，我就清早call定貨車搬嘢走⋯⋯亦有遇過唔友善嘅鄰居，叫一大班人夜晚嚟搵我，我𠵱家租屋，好多時都要一畀就畀半年租金。」
張致恒欠債累積逾百萬
多年逆境令張致恒欠債累積逾百萬元，他表明每一筆帳目都銘記於心：「感激幫過我嘅人，先有我呢條命。我成日都諗搵錢返嚟，好想有日喺IG講還晒錢。我亦好真心多謝我老婆，7年生咗4個小朋友，仲發生咁多嘅事。佢想買咩、食咩都畀佢。」為了將微薄資源留給四名年幼兒子，張致恒已有5年沒有添置新衣鞋襪，平日一家人大多足不出戶以紙皮自製玩具，難得外出用膳亦必定將剩菜打包。談及四名兒子，張致恒心酸分享：「既然生咗佢哋出嚟，唔好話畀資源，至少令佢哋快高長大，健康成長。我曾經同大仔講Daddy做錯事，令到媽咪好嬲，Daddy𠵱家好窮，買唔到好多嘢畀你，希望你大個後，我可以畀番多啲嘢你。佢都生性嘅，見到同學有個Labubu，同我講想買一隻，但我話幾百蚊可以買到幾罐奶粉，佢就答︰『唔緊要啦，我自己畫。』希望佢哋將來會原諒我。」
雯雯欲申請綜援過穩定生活
面對未來去向，夫妻兩人出現嚴重分歧，雯雯認為演藝圈收入飄忽，加上四個小朋友各有特殊情況，坦言希望申請綜援換取穩定生活：「佢講一套，做一套，講到好完美。我唔想佢做呢行，因為唔保證下一月係點，我唔想周圍求人，但綜援每個月穩定。加上，我一個人湊唔到四個，𠵱家嘅情況，大仔有情緒問題，比較焦慮同敏感；二仔有自閉同過度活躍症，唔識表達，現時仲要飲奶、用尿片；三仔係最穩定，四仔稍後都要評估，佢哋幾個有時仲會打交。為咗方便照顧啲仔，我哋𠵱家分房瞓，各自帶兩個。我𠵱家冇咩想法，只想每日湊好佢哋。」不過，張致恒堅持自力更生拒絕領綜援，並積極減磅備戰重投樂壇：「（攞綜援）只會依賴，之後就唔可以出去做嘢。我唔係發明星夢，真係想喺呢個圈搵錢，呢個係我老本行，我唔使重新適應，當然一定要減個身形先，企上台唱歌，就可以搵錢。」
想睇最新一期《東周刊》詳細報導，即刻點擊：https://bit.ly/4xSAeRo
防止自殺求助熱線：
「情緒通」精神健康支援熱線及WhatsApp：18111；網址：https://www.shallwetalk.hk/zh/
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
明愛財困壓力輔導熱線: 3161 0102
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
青少年情緒健康網上支援服務「Open 噏」：https://www.openup.hk/service