雯雯因财困陷崩溃夫妻分房瞓 《东周刊》独家爆张致恒借财仔遭逼唱〈死性不改〉减息
现年41岁的张致恒与粉丝区燕雯（雯雯）结婚7年、4年抱4，惟婚后长期深陷严重财困，雯雯频频于社交平台公开炮轰老公兼闹离婚，令两人被网民封为「离婚界KOL」及「借钱界KOL」。日前，张致恒与雯雯罕有夫妻档接受最新一期《东周刊》独家访问，剖白近年饱受的辛酸。
张致恒：一直谂点做个好爸爸、好丈夫
面对雯雯多次放负，外表渐见斑白沧桑的张致恒直言：「生仔后，都努力改变自己，先有个好将来。呢7年，我系有做错嘅时候，但都一直有谂点做个好爸爸、好丈夫，但夫妻嘅磨合，真系需要时间，否则好难行落去。（太太经常放负批评？）系攰嘅，当沟通唔到，有冇谂点解唔一早离婚？但小朋友已经出世，就谂点改变去迎合个家庭。」至于雯雯坦言因怀孕结婚，但生活捉襟见肘才上网发泄，直言想离婚却「冇能力带走4个，惟有顶多一日得一日。」张致恒则体谅太太承受巨大公众压力而选择包容，并斩钉截铁表示绝不轻言离婚：「离婚一定唔会讲，结得婚，就做好丈夫责任。有时系想放弃，好多次向耶稣祈祷带我走，我唔想烦，要维持一个家庭系好攰。但做咗老窦，一家之主，原来系高难度。以前我钟意饮酒，但雯雯最憎酒气，我𠵱家连饮酒放松自己都唔敢。真系好多次想去自杀，但谂起小朋友，就放弃呢个念头。」
雯雯忆最徬徨时 闻张致恒财困感崩溃
一家六口每月生活费至少3万元，张致恒因以往负面新闻形象受挫，放低艺人光环转做地盘及搬运，但收入仍难以应付日常开支。雯雯回忆最徬徨时：「佢一句冇钱，车费都冇，啲仔换咗校服都坐晒喺度，我真系崩溃！」陷入绝境的张致恒唯有向身边亲友借贷，借无可借之下硬著头皮涉足旺角财务公司，岂料惨遭当场羞辱，他忆述：「第一次上财务公司，人哋一开门︰『哗！大明星嚟借钱？』但最唔开心系，佢叫我唱〈死性不改〉，免你几千蚊（利息）啦！被人玩嘅感受，真系好难受。事后，我冇唱但有借，我亦有去过其他财务公司，却遭拒绝，徬徨到跪埋一边喊，真系唔知点算？」财困消息传出后，张致恒更遭地产公司列入黑名单，租屋屡遭逼迁：「试过租到屋，但后来业主知道租畀我，就向中介要求我哋漏夜搬走。当时，我喺内地登台，最终佢哋凌晨3、4点去咗我阿爸观塘𠮶度，我就清早call定货车搬嘢走⋯⋯亦有遇过唔友善嘅邻居，叫一大班人夜晚嚟揾我，我𠵱家租屋，好多时都要一畀就畀半年租金。」
张致恒欠债累积逾百万
多年逆境令张致恒欠债累积逾百万元，他表明每一笔帐目都铭记于心：「感激帮过我嘅人，先有我呢条命。我成日都谂揾钱返嚟，好想有日喺IG讲还晒钱。我亦好真心多谢我老婆，7年生咗4个小朋友，仲发生咁多嘅事。佢想买咩、食咩都畀佢。」为了将微薄资源留给四名年幼儿子，张致恒已有5年没有添置新衣鞋袜，平日一家人大多足不出户以纸皮自制玩具，难得外出用膳亦必定将剩菜打包。谈及四名儿子，张致恒心酸分享：「既然生咗佢哋出嚟，唔好话畀资源，至少令佢哋快高长大，健康成长。我曾经同大仔讲Daddy做错事，令到妈咪好嬲，Daddy𠵱家好穷，买唔到好多嘢畀你，希望你大个后，我可以畀番多啲嘢你。佢都生性嘅，见到同学有个Labubu，同我讲想买一只，但我话几百蚊可以买到几罐奶粉，佢就答︰『唔紧要啦，我自己画。』希望佢哋将来会原谅我。」
雯雯欲申请综援过稳定生活
面对未来去向，夫妻两人出现严重分歧，雯雯认为演艺圈收入飘忽，加上四个小朋友各有特殊情况，坦言希望申请综援换取稳定生活：「佢讲一套，做一套，讲到好完美。我唔想佢做呢行，因为唔保证下一月系点，我唔想周围求人，但综援每个月稳定。加上，我一个人凑唔到四个，𠵱家嘅情况，大仔有情绪问题，比较焦虑同敏感；二仔有自闭同过度活跃症，唔识表达，现时仲要饮奶、用尿片；三仔系最稳定，四仔稍后都要评估，佢哋几个有时仲会打交。为咗方便照顾啲仔，我哋𠵱家分房瞓，各自带两个。我𠵱家冇咩想法，只想每日凑好佢哋。」不过，张致恒坚持自力更生拒绝领综援，并积极减磅备战重投乐坛：「（攞综援）只会依赖，之后就唔可以出去做嘢。我唔系发明星梦，真系想喺呢个圈揾钱，呢个系我老本行，我唔使重新适应，当然一定要减个身形先，企上台唱歌，就可以揾钱。」
想睇最新一期《东周刊》详细报导，即刻点击：https://bit.ly/4xSAeRo
防止自杀求助热线：
「情绪通」精神健康支援热线及WhatsApp：18111；网址：https://www.shallwetalk.hk/zh/
香港撒玛利亚防止自杀会： 2389 2222
生命热线： 2382 0000
明爱向晴轩： 18288
明爱财困压力辅导热线: 3161 0102
社会福利署： 2343 2255
撒玛利亚会热线(多种语言)： 2896 0000
东华三院芷若园： 18281
医管局精神健康专线： 2466 7350
青少年情绪健康网上支援服务「Open 噏」：https://www.openup.hk/service