我的中國心丨張明敏入紙紅館6次冇回音 轉戰啟德即獲批 坦承：只開一場驚賣唔晒

經典歌曲《我的中國心》的原唱在張明敏今日宣傳11月28日在啟德體藝館舉行巡迴演唱會，杜燕歌、李龍基出席記者會撐場。訪問中張明敏指出：「喺呢十年裏面，我諗應該係申請咗六次，但係都冇回音。」今次在朋友鼓勵下轉申請啟德，怎料一次就獲批，他連說感謝：「我心願都係喺香港做一個個人演唱會，所以非常之感謝今次。」出道超過40年來，終於首次在港開演唱會：「呢個係天時地利人和。」

張明敏指香港人唔鍾意去啟德

被問為何只開一場？他笑說：「驚賣唔晒。」隨即補充香港人的購票習慣：「個個都唔鍾意去啟德㗎。香港人好鍾意落車就去紅館，你叫佢喺啟德花十零廿分鐘，佢都覺得唔方便就走啦。」他承認啟德空曠、要多行一段路，自己亦不敢一次開多場：「等咗咁多年都開得一場，你冇辦法啦，一場都驚唔爆。」

張明敏由抗戰唱到國語流行曲

談到曲目，他說自己過往在港唱的，多是抗戰歌曲、《我是中國人》一類「大愛」作品，「冇一啲好小愛嘅歌曲」。今場會分開幾個段落：由文革、抗日戰爭歌曲，再到六、七十至八十年代國語流行曲，「係一個國語歌嘅一場介紹」。他更希望邀請學校、小朋友一齊唱愛國及抗戰歌曲，「等啲同仁都能夠一齊參與。」服裝方面，他打算穿中山裝上台：「想將嗰個感恩嘅心講俾佢哋聽。」

張明敏李龍基杜燕歌撐場

他表示嘉賓尚未完全落實，葉佳修已答應支持，他視為盛事：「以前台灣歌手嚟香港係家常便飯，最近幾十年少之又少。」今日杜燕歌、李龍基出席記者會支持張明敏，張明敏與杜燕歌早於18歲相識，至於對方到時會否做表演嘉實？張明敏知對方在內地拍劇檔期緊逼，仍希望其到時幫忙，更笑指對方「都好口痕，希望佢到時幫我啦。」