蔡思貝拒做認命視后 離巢圓夢做星爺「條𡃁」丨名人雜誌

「父母之命，媒妁之言」，聽就聽得多，卻每天都在與香港相距不足3000公里、5小時飛機路程外的尼泊爾不斷上演。視后蔡思貝今年以國際培幼會義務大使身份遠赴當地，不是睇風景，而是走進村落，聽官員談童婚，遇見16歲的尼泊爾童婚少女麗迪嘉。香港同齡女孩在扮靚、追星、行街歎奶茶，但麗迪嘉已經要為一個不相熟的丈夫照料爺爺嫲嫲，整副家頭細務都扛上身。探訪中小女孩沒有喊冤，也沒有說想逃，蔡思貝後來反覆記得的，正是這份「不以為然」，將命運說成責任，責任又說成人生。撰文：林朗勞 攝影：林賓尼

時間點上，這趟行程剛好與蔡思貝的「人生新章節」重疊起來。離開舊公司TVB後，工作較完整地由自己掌握，擱置多年的邀請才終於接下來，思貝說：「同朋友食飯嘅時候都喺度講：『好神奇！』緣份就係冥冥中需要喺今年先令到我做得到呢個探訪，因為之前邀請我，都係拒絕，因為冇辦法做得到。今年都係我人生新章節。」也就在這個新章節裏，她遇見麗迪嘉。思貝沒有明說，卻似是在麗迪嘉身上看見自己的倒影，分別只不過是，麗迪嘉接受了自己的命運，而思貝選擇了一條自己期望中的路。

見證童婚少女厄運

麗迪嘉16歲便要照顧陌生丈夫的祖父母，家姐私奔後，父親為了面子把她嫁給門當戶對的人家，她只回了一句，不想爸爸不開心，把安排當成命運收下。同一年，蔡思貝離開舊公司，戲接不接有原則，網上「試鏡」後一年多仍不知有沒有《功夫女足》的角色，做gym做到辛苦，仍跟自己說再撐幾下。一個接受命運，一個把命運握回自己手上，思貝說：「童婚對香港人嚟講係完全冇概念，去完才知原來可以有咁大impact（影響）。女仔未成年已經俾人安排去第二個家庭，負責晒家頭細務，幫唔識嘅丈夫照顧爺爺嫲嫲。講緊16歲咋！我哋16歲去緊影貼紙相、飲緊珍珠奶茶。What’s going on？」

公司之命如父母之命

麗迪嘉的身世在當地並不戲劇化，家姐私奔，父親覺得羞家，不想她重蹈覆轍，於是把她嫁給門當戶對、階序更高的家庭，好讓自己有返一丁點面子。探訪時問她意願，答案只有一句，思貝說：「佢答：『我唔想爸爸唔開心吖嘛，咁我都要做呢件事啦。』最心噏係佢哋嘅mindset（思維模式），呢個責任就係佢嘅人生。冇覺得有幾唔妥而去反抗，已經欣然接受。」若把這句搬回香港娛樂圈，便很易聽成另一種「父母之命」：公司之命，檔期之言。叫你接的就接，叫你演的就演，聽話的人走得比較順，不過思貝沒有把舊公司的名字放進句子。麗迪嘉把責任當成人生，思貝則怕沒有了自己。
　　
被問如果她是這個16歲女孩將會如何？思貝認為自己該是反抗的人，多年教育教她要為自己挺身而出，但若在那樣的文化中長大，她承認分分鐘與麗迪嘉一樣：「我算係有自己諗法，對角色有一定認知、有一定設計，我會喺尊重導演嘅情況之下同佢討論，『喂，呢一刻我唔跟劇本，我覺得佢應該有咁嘅反應，得唔得呀？』至於做唔做呢啲工作，我都會有原則！」

唔因攞視后而覺得叻

提到舊公司向來喜歡聽話的人，思貝說：「可能就會稍微艱辛啲，要促成一件事，可能來來回回多幾轉，但係我覺得冇問題嘅。你冇理由一世為咗please人哋而做，please晒所有人，但係你真係會冇咗自己！」路不平坦四個字，她始終沒說出口，亦不把「叫就做」當成本份：「我唔係要去刻意刁難，有啲嘢會影響到我自己嘅人設，影響到我自己嘅堅持、理念，我冇理由合埋眼就做咗佢，做咩要揞住良心啫？」在職場生存，連視后都改寫不了這套方法。思貝說沒試過沒有「事後」的人生，到底是「視后」還是「事後」？她說：「真心唔係謙虛，我絕對冇因為攞視后而覺得自己好叻，一啲都冇！當刻係一個認可，但第二朝瞓醒起身，都係繼續做返蔡思貝，你停止就會被淘汰！」
　　
得獎是一夜的認可，但真正延長了的自我證明，則是後來那套還未確定屬誰的《功夫女足》。試鏡結束後，很長一段日子沒人告訴她究竟是否得到角色。那一年做gym做到辛苦，思貝仍跟自己說：再撐幾下，那幾下是為了沒有期望值的角色，思貝說：「試鏡完冇通知有角色。一年幾之後突然message叫去深圳訓練，去都未知有冇戲。我就keep住體能同動作下苦功，準備定先！我好相信個宇宙，要有信念！」
　　
和周星馳最初的認真互動，發生在社交網，思貝留言想做對方「條𡃁」，得到一句「應承你！點報答我先？」星爺寫的「心想事成揮春」後來真的寄到了，那張揮春一直都沒有被拆開，放在盒子中保存，思貝說：「真係心想事成，就係可以同佢合作，我覺得好微妙。點報答？好好哋做好個角色，喺片場唔好激到佢嘔血，做到佢想要嘅效果，呢個就係我嘅報答！今次演出佢又認可我，我當報答咗！」