馬貫東苦捱20年攻男一 媽媽受壓心疼兒子被誤解 李家鼎舊情掀餘波丨獨家
馬貫東入行20年，3年前《死有對証》終嘗「男一」滋味！劇中滾山坡搏到盡，面對《東周刊》爆出母親與李家鼎（鼎爺）20年舊情及媽媽捲入李家爭產風波，他剖白經營的寵物美容店已回本，不用靠媽媽關係，未來目標買樓俾媽媽。採訪：方騫平 攝影：羅安強 場地：潔寵@土瓜灣美景街
馬貫東入行20年，3年前拍落的《死有對証》首次做「男一」。他笑言當時對所有嘢都陌生，所以盡量放鬆去拍，冇太多鋪排；反而第2套主演的《臥底嬌娃》有較多設計，相對壓力更大。
首做男一搏盡冇後悔
《死有對証》中，馬貫東演重案組警察，打鬥、碌樓梯、滾山坡統統有份。問到首做男一是否搏到盡？他強調：「我係咪都會搏到盡，都係武指睇得起我，全部都要我做。」最難忘有幕在偏斜山坡滾下去，雖然工作人員已清理樹枝及碎石，但都未必控制到軌道，有機會受傷；他卻豁達說：「就算受傷，就當作多一個記憶點。」他解釋，不論是否男一都會搏。另外，轉做主角都需要適應及拿捏：「以前我主要如何支撐主角演戲，突然轉咗主角，做得反而不突出，導演提醒我要調節，轉變成『實淨啲演出』。
打後他回復做配角，卻沒有不是味兒：「其實每個角色都由自己去創造，只要角色成功，係唔需要理會做主角定配角。我做戲原因只係鍾意做戲，只要有得演就得㗎啦，而唔係要爬到有幾高。好似學咗好耐扮死屍都要有戲，演過幾次死屍都嫌自己演得唔夠真，盡力做好就夠。做到自己鍾意嘅嘢已經好幸福。當日全家都支持我選擇做演員，交代到自己就OK。」
講到家人，早前《東周刊》獨家爆料，關於其母親與李家鼎昔日的一段20年舊情，當年靠對方引薦入行，更拉入李家爭產風波。馬貫東承認媽媽始終係圈外人，突如其來嘅壓力會令她不開心，尤其更擔心他：「佢擔心我會惹閒言閒語，『因為鼎爺關照才有得做』。」他反而豁出去安慰媽媽，還拋下金句：「明就明囉，唔明就唔使解釋，唔明解釋都唔明。如果咁容易會得到『優勢』嘅話，呢兩個角色唔到我去做，亦都唔會等咗咁多年先至有兩次主角機會，咪當為娛樂新聞囉。現在佢心情OK返，喺外國湊孫過住悠閒嘅生活。」
母親告別塞錢日子
馬貫東強調大人的感情問題更加控制不到：「佢哋想點就點啦，我唔會干預上一代人做乜㗎喇。」唯一好處，反而增加了他的知名度，讓觀眾認識他，連帶令人知道他做寵物美容及設有領養：「咁都幫到好多貓貓，係正面嘅，哈！如果開心去睇，就會覺得正面，我對娛樂新聞冇乜太大感覺，冇乜所謂啦。」他的寵物美容店已回本，進展相當理想：「媽媽唔使擔心我經濟狀況好耐，佢冇再塞錢俾我啦，寵物美容店都唔使佢幫忙，因為近十年我都打兩份工，包括幫朋友做餐廳侍應、健身教練及湯包生意，咁有時間做乜唔做嘢呢？」他希望拓展寵物美容事業，甚至和獸醫合作，目標買樓俾媽媽。演藝上有乜角色都做，始終較被動。
鼎爺教誨謹記在心
他亦大方談鼎爺：「佢教我『少說話多做事，乜都唔好蝕底』，我行動做咗出嚟㗎啦，因為冇人比佢哋更有資格去評論呢件事，我都冇資格講任何嘢，係佢哋感情事。」入行前鼎爺教他騎馬，為拍古裝做準備：「我好尊重呢位前輩，但𠵱家少咗聯絡。」因爭產風波牽連，馬貫東見李泳豪可會尷尬？他即說：「拍《愛·回家》時見到面都有打招呼，冇乜特別啫，呢啲都係娛樂新聞。」