容天佑與富貴妻遇外傭走佬極崩潰 嬰兒房變惡臭蟻竇 厚顏索機票回鄉 疑偷合約恐遭收數
容天佑與太太扶天恩（Winnie）的女兒「澄澄」在今年５月出世，這對新手父母不時分享女兒的萌爆可愛相，昨日扶天恩在IG撰長文大吐苦水，控訴遭遇無良外傭精心部署「走佬」潛逃的事件，並留下一個令人作嘔的恐怖爛攤子，令夫婦二人極度崩潰。
扶天恩慘痛遭遇得到不少同情
扶天恩的慘痛遭遇得到不少圈中好友與及網民的同情，莊雅婷說：「可以去勞工處同入境處備案～ 避免佢再黎香港玩其他僱主。」扶天恩亦有回覆：「知道，不過好似話佢哋可以改名同埋改出生日期，就可以重新出發了~」向海嵐亦說：「OMG! 嗰日聽到都覺得匪夷所思。原來後續仲要你地補機票，希望唔好有其他手尾。最驚有人追數。」
扶天恩的外傭姐姐精心部署「不辭而別」
扶天恩昨日在IG撰長文，大吐苦水表示外傭姐姐趁她出埠公幹，精心部署「不辭而別」。外傭姐姐在她離港首日即清空衣櫃潛逃，甚至在機場因故被遣返。更令人崩潰的是，外傭臨走前在嬰兒房倒瀉咖啡不顧，令房間慘變惡臭「蟻竇」，大批嬰兒用品全數報廢。事後外傭姐姐更透過中介厚顏要求僱主買機票送其回鄉，連僱傭合約亦告失蹤，令扶天恩無奈慨嘆僱主毫無保障。全文如下：
我工人係我出trip嘅第一日冇返屋企。佢知道我要離開香港七日，所以精心部署走佬計劃！
第一日夜晚，當日係星期日，我老公收工返到屋企，夜晚11:00發現姐姐竟然唔喺屋企！？
所以我WhatsApp佢問佢安唔安全，有冇事，佢已讀不回。第二日我繼續WhatsApp佢，變咗一個剔，打電話都唔通，我又身處海外，一路做嘢一路擔心佢有啲咩事。去到第三日，我都如常每隔一個鐘就打俾佢同WhatsApp佢，去到下晝，佢終於都覆我訊息！！！我問佢，你去咗邊呀？咩事呀？佢同我講我一路都喺香港，可唔可以等你返嚟先同你解釋？
我同佢講，我唔知你喺邊度，又擔心你有啲咩危險，我覺得你有必要依家同我講發生咗咩事。
然後有另一個香港人拎咗佢個電話聽，佢同我講，hello我喺香港國際機場嘅地勤人員，你姐姐飛咗去某一個地方，但係俾人遣返咗，所以姐姐唔知道依家應該去邊。其實本身我都心中有數，因為佢走佬嘅嗰一晚，我老公見到佢個櫃入面已經冇乜嘢，淨係留咗一杯飲剩嘅咖啡同埋食咗兩啖嘅方包擺咗喺枱面。當然，佢本身諗住走佬嘅話，我唔會想佢返屋企(好彩我離開香港嗰日，我將我個女帶咗去我媽咪度，屋企得反兩隻狗急到瀨咗尿嘅狗）
所以我叫佢去agent度，等agent安排。（先撇除唔講佢平時做嘢態度同埋極度污糟嘅工作表現）啱啱落機返到屋企，諗住大掃除做清潔，發現佢喺BB房倒瀉咗咖啡，冇抹返乾淨不特止，仲惹到成地都係蟻，所有尿片，同埋其他BB嘢都佈滿蟻，牆上面同埋地下已經有漬同埋好臭
基本上所有尿片都唔用得，成間房要反轉重新清潔，滅走晒啲蟻。Agent話姐姐要求我而家即刻買機票，佢要求明天返菲律賓。而家請工人真係好難，請到好工人真係要好好珍惜，僱主太無保障了。File入面嘅合約又唔見埋 希望一個月後唔會收到收數公司嘅信啦！
扶天恩希望政府可以正視一下
其後更有不少網民分享個人經歷，扶天恩說：「我收到好多好多好多人同我講佢嘅朋友或者自己嘅工人姐姐都係喺呢兩個禮拜突然間走咗佬，希望政府可以正視一下。」她又稱仍未買機票，可能最後都要為對方安排，但有人說：「擅離職守，無故失聯可以唔使補機票，Agent有機會同工人姐姐夾埋扯貓尾？」扶天恩再說：「後尾我查到僱傭條例，佢擅自離咗境再返返嚟香港的話，好似已經唔關我事。」當然亦有人提議報《東張》，不過最令扶天恩感頭痛：「請過個又要等一段時間了！」