苏雅琳自爆闺房乱到7.5分可在内吃零食 着过嘅衫放椅唔郁 拍《金秘书》获卢瀚霆万岁

今日苏雅琳（Ivy So）出席傢俬用品店活动时大爆闺房秘密。苏雅琳笑言，可能是因为早前访问中透露过闺房有多乱，才邀请她出席活动。访问中，苏雅琳自评房间，以1至10分计，混乱程度有7.5分，更大爆平时习惯将着过的衣物放在椅子上不整理。又表示会在自己间房食零食。

苏雅琳常偷弟弟衫着

不过，她也辩解道，很多时衣物只是穿了一至两小时，才放在椅子上。问她有没有受到妈妈责备？她回答：「佢已经讲咗咁多年，呢几年冇讲，我觉得佢惯咗，而唔系我整齐咗，不过我都有改善，又可能系少咗时间喺屋企。」她又透露，自己经常会在弟弟房间「打趸」，说：「佢间房有3分，我会成日坐喺床同佢打机，感觉明亮啲，佢有位坐，我又有位坐。我间房张凳坐唔到人。」她也透露，自己会「偷」弟弟的衣物着，贪可以当做oversize穿搭。

苏雅琳理想男友要整齐但冇洁癖

谈到「执屋」，她也表示希望将来男朋友是一个较整洁的人说：「我细佬嘅整洁程度系我理想型。即系唔好有洁癖，可以喺间房食嘢，但系要整整齐齐。唔好阻止我喺房间食嘢！（惹曱甴㖞）唔会㗎，每一粒我都会塞入口度。」她提到，可以接受在房间内食糖、雪条、薯片等，但唯独是不能接受汤面类。

卢瀚霆常「万岁」请饮食

另外，苏雅琳表示与卢瀚霆（Anson Lo）合作的《金秘书为何那样》进入拍摄尾声：「希望大家会钟意。（同李英俊拍剧开心？）开心！又请我饮嘢。」她表示，最常与Anson Lo在片场「倾嘢食」，Anson Lo又会请饮咖啡和「万岁」。她说：「我推荐咗大家饮牛油果乳酪，加羽衣甘蓝，超好饮！成队crew都钟意，得阿Lo一个唔钟意。（听个名就知好健康）都好饮嘅，希望大家试吓阿Lo唔钟意饮嘅嘢。」她表示自己fans不会因她和Anson Lo拍剧而呷醋，而Anson Lo的fans也对她十分友善，说：「一开始都会惊，但系拍街景都有好多阿Lo fans探班，我觉得过程冇乜压力。我走嘅时候，大家都会话：『多谢金秘书照顾李英俊！』我觉得都Sweet嘅。」所以相信神徒好接受偶像和Ivy So做荧幕情侣。