浪花男女｜Jeffrey冧女戒講大話 楊偲泳怕收男神Fans刀片信 初組CP意外頻生｜專訪

電影《浪花男女》男、女主角魏浚笙（Jeffrey） 、楊偲泳（Renci） 自認「無聊男女」一拍即合，見面即玩起詠春黐手。受訪問時，Renci超細心，見Jeffrey臉上黐住化妝掃毛，即著芙蓮（Jeffrey拍拖十年女友兼經理人）整理。轉個頭，兩人談拍攝點滴變互窒，霎時充滿浪花！

楊偲泳同魏浚笙組銀幕情侶有壓力

在《浪花男女》中，Renci演wakesurf（尾波衝浪）教練，Jeffrey則是初哥，為追女仔而下海。Renci有玩開wakesurf，令她緊張的反而是同Jeffrey組CP，「我驚收到佢Fans嘅刀片信！你睇住我呀！」身旁的Jeffrey即反白眼。惟戲中無太多親密場面，Renci︰「導演（馮志強）想要初戀feel。」這對CP相處之間，充斥謊言，問現實中，能接受另一半怎樣程度的謊言？Jeffrey英雄救美搶答︰「角色講大話，動機係想補救。我始終認為真正嘅感情關係，坦白係基本！事事隱瞞，對雙方都構成壓力。我拍拖，有乜嘢事都攞出嚟講，咁先係互相尊重，可以繼續行落去。」楊偲泳不斷點頭認同。

楊偲泳、魏浚笙互窒有浪花

Renci憶拍攝《浪花男女》點滴，「我同阿笙（拍攝場地風浪、快艇 引擎聲極大，大叫Jeffrey，他聽不到，索性改口）有好多共同朋友，第一次聚會見到佢，我哋都好靦腆、客氣。拍戲先開始熟絡。阿笙好有主見，嚟到拍攝現場，佢唔會自顧自化妝，有乜嘢問題就即刻傾、解決。我哋頻率好近，相處好舒服。」Jeffrey：「我覺得Renci好有型，有個性！我哋都係直接、爽快嘅人，Off camera就講廢話，Renci係男子頭，成日叫我收聲，我話『你仲多嘢講啦』！」Renci搞笑稱︰「多謝你終於肯讚我！」

魏浚笙怕蜜蜂

Renci讚Jeffrey是「氣氛擔當」，自動生成許多話題，「佢係偶像，拍戲一樣搏盡，連受傷都唔驚！」當時拍wakesurf場面，他意外被繩索勒傷頸部，「阿笙仲要調番轉安慰我哋，『大家冷靜啲，我冇事，唔使擔心』，其實嗰次意外好恐怖！我諗佢除咗蜜蜂之外，乜都唔驚！」Jeffrey笑說︰「蜜蜂係我天敵！」拍戲現場有蜜蜂飛來飛去，「我都解釋唔到點解驚！我試過忍，身邊啲人話唔好郁就得……但我一諗起佢會『針』我，就即刻跑走！」令全場爆笑。

楊偲泳撐留港消費

早年疫情時，社交距離限制質與處所關閉，興起wakesurf熱潮，《浪花男女》的構思源自於此，Renci︰「疫情後，好多人周圍飛去旅行。我認識一啲船家，都話生意少咗。香港好靚嘅，希望大家多啲探索呢項運動，延續落去。」同時借故事談網絡欺凌，Renci︰「純粹宣洩壞情緒、用侮辱性字眼，大把，睇到我都會諗：『你留言使唔使咁誇張呀？』冇辦法，唯有同佢哋共存啦。反而我幾鍾意去謝票，同觀眾面對面，佢哋會如實話你知對齣戲嘅感受，係真心交流。」

魏浚笙畀網民鬧周身郁

Jeffrey則認為︰「我冇網絡欺凌呢個諗法。網絡好似紀錄咗藝人一舉一動咁，有網民留言話我成日郁身郁勢！吖，佢講中咗，之後我逢係對鏡頭做訪問，都盡量定啲。網民唔講，我未必知道嘅，反而多謝佢哋。」

楊偲泳爆魏浚笙賺埋唔少

玩wakesurf，人在水中，靠快艇尾波「起水」（站在滑板上），風向是關鍵，故事中提到逆風、逆境自強message，Renci入行9年，Jeffrey入行5年，Renci再發功︰「阿笙成就已經超越咗我哋，賺錢多過我哋！」Jeffrey再次反白眼。《浪花男女》是Jeffrey第二齣電影，拍戲令他急速成長，「好似打機過關，每個階段學嘢，了解多啲自己。」勒頸受傷意外，「無論壞事定好事，都係人生一部分，要感恩，活在當下。」不為往事煩惱，不為未來擔憂，專注此時此刻，叻仔！

楊偲泳、魏浚笙唔當自己係主角

Renci 說，香港人最叻打逆境波，「小朋友跌低先學識行。人生冇挫折，就唔識珍惜。香港演員好似三文魚，逆流都會繼續衝！」她的朋友為生活、養家，興趣不能當飯食，「我託賴啦，希望……演戲係我終生職業。」Jeffrey認為，一齣戲從來不是一個人的戰場，Renic補充：「喺片場最開心係，我哋冇抱住『我係主角』心態，而係一班人為共同目標施展渾身解數，做好件事，一齊享受。」