浪花男女｜Jeffrey冧女戒讲大话 杨偲泳怕收男神Fans刀片信 初组CP意外频生｜专访

电影《浪花男女》男、女主角魏浚笙（Jeffrey） 、杨偲泳（Renci） 自认「无聊男女」一拍即合，见面即玩起咏春黐手。受访问时，Renci超细心，见Jeffrey脸上黐住化妆扫毛，即著芙莲（Jeffrey拍拖十年女友兼经理人）整理。转个头，两人谈拍摄点滴变互窒，霎时充满浪花！

杨偲泳同魏浚笙组银幕情侣有压力

在《浪花男女》中，Renci演wakesurf（尾波冲浪）教练，Jeffrey则是初哥，为追女仔而下海。Renci有玩开wakesurf，令她紧张的反而是同Jeffrey组CP，「我惊收到佢Fans嘅刀片信！你睇住我呀！」身旁的Jeffrey即反白眼。惟戏中无太多亲密场面，Renci︰「导演（冯志强）想要初恋feel。」这对CP相处之间，充斥谎言，问现实中，能接受另一半怎样程度的谎言？Jeffrey英雄救美抢答︰「角色讲大话，动机系想补救。我始终认为真正嘅感情关系，坦白系基本！事事隐瞒，对双方都构成压力。我拍拖，有乜嘢事都攞出嚟讲，咁先系互相尊重，可以继续行落去。」杨偲泳不断点头认同。

杨偲泳、魏浚笙互窒有浪花

Renci忆拍摄《浪花男女》点滴，「我同阿笙（拍摄场地风浪、快艇 引擎声极大，大叫Jeffrey，他听不到，索性改口）有好多共同朋友，第一次聚会见到佢，我哋都好腼腆、客气。拍戏先开始熟络。阿笙好有主见，嚟到拍摄现场，佢唔会自顾自化妆，有乜嘢问题就即刻倾、解决。我哋频率好近，相处好舒服。」Jeffrey：「我觉得Renci好有型，有个性！我哋都系直接、爽快嘅人，Off camera就讲废话，Renci系男子头，成日叫我收声，我话『你仲多嘢讲啦』！」Renci搞笑称︰「多谢你终于肯赞我！」

魏浚笙怕蜜蜂

Renci赞Jeffrey是「气氛担当」，自动生成许多话题，「佢系偶像，拍戏一样搏尽，连受伤都唔惊！」当时拍wakesurf场面，他意外被绳索勒伤颈部，「阿笙仲要调番转安慰我哋，『大家冷静啲，我冇事，唔使担心』，其实𠮶次意外好恐怖！我谂佢除咗蜜蜂之外，乜都唔惊！」Jeffrey笑说︰「蜜蜂系我天敌！」拍戏现场有蜜蜂飞来飞去，「我都解释唔到点解惊！我试过忍，身边啲人话唔好郁就得……但我一谂起佢会『针』我，就即刻跑走！」令全场爆笑。

杨偲泳撑留港消费

早年疫情时，社交距离限制质与处所关闭，兴起wakesurf热潮，《浪花男女》的构思源自于此，Renci︰「疫情后，好多人周围飞去旅行。我认识一啲船家，都话生意少咗。香港好靓嘅，希望大家多啲探索呢项运动，延续落去。」同时借故事谈网络欺凌，Renci︰「纯粹宣泄坏情绪、用侮辱性字眼，大把，睇到我都会谂：『你留言使唔使咁夸张呀？』冇办法，唯有同佢哋共存啦。反而我几钟意去谢票，同观众面对面，佢哋会如实话你知对出戏嘅感受，系真心交流。」

魏浚笙畀网民闹周身郁

Jeffrey则认为︰「我冇网络欺凌呢个谂法。网络好似纪录咗艺人一举一动咁，有网民留言话我成日郁身郁势！吖，佢讲中咗，之后我逢系对镜头做访问，都尽量定啲。网民唔讲，我未必知道嘅，反而多谢佢哋。」

杨偲泳爆魏浚笙赚埋唔少

玩wakesurf，人在水中，靠快艇尾波「起水」（站在滑板上），风向是关键，故事中提到逆风、逆境自强message，Renci入行9年，Jeffrey入行5年，Renci再发功︰「阿笙成就已经超越咗我哋，赚钱多过我哋！」Jeffrey再次反白眼。《浪花男女》是Jeffrey第二出电影，拍戏令他急速成长，「好似打机过关，每个阶段学嘢，了解多啲自己。」勒颈受伤意外，「无论坏事定好事，都系人生一部分，要感恩，活在当下。」不为往事烦恼，不为未来担忧，专注此时此刻，叻仔！

杨偲泳、魏浚笙唔当自己系主角

Renci 说，香港人最叻打逆境波，「小朋友跌低先学识行。人生冇挫折，就唔识珍惜。香港演员好似三文鱼，逆流都会继续冲！」她的朋友为生活、养家，兴趣不能当饭食，「我托赖啦，希望……演戏系我终生职业。」Jeffrey认为，一出戏从来不是一个人的战场，Renic补充：「喺片场最开心系，我哋冇抱住『我系主角』心态，而系一班人为共同目标施展浑身解数，做好件事，一齐享受。」