許廷鏗孖廿四味Brian「着兩條褲」做帶貨 自爆不驚拍檔爆粗：最驚我都爆埋 想約欣宜打牌放鬆心情

「真・星級牙醫」許廷鏗和「廿四味」成員Brian李凱賢今日（28日）出席超級市場直播帶貨活動。許廷鏗接受訪問時，坦言自己未做過帶貨，還要與Brian首次合作，說：「我食嘢比較多，但係同呢個着兩條褲食叉燒嘅朋友就第一次合作。」並謂自己也「着咗兩條褲」。訪問中，他也談及好朋友鄭欣宜的近況。

許廷鏗認自細識廿四味

他笑言：「我正常着兩條褲，一條係底褲，一條面褲，可能佢着三條。」當日直播活動為介紹新西蘭產品，他也表示兒時曾到訪當地，雖記憶不深，但想再次與家人同行到當地旅遊。問到會否擔心Brian在直播中「爆粗」，他笑言：「我唔怕呀，最驚我都爆埋粗啫，啱返個channel，同埋我好驚中英夾雜，因為佢好多英文，但係我覺得佢係過癮嘅。」他表示，自己也是「廿四味」的歌迷：「我好細個就識佢啦，廿四味嘛。」

許廷鏗牙醫診所料近2個月內開張

最新有新聞指他開牙醫診所，他表示自己有足夠經驗，所以與姐姐合作開一站式醫療中心。「確實我嗰邊開嘅日子待定，都會邀請一啲好朋友嚟。（今年內？）一定今年內，應該呢一兩月內發生。（一齊去睇牙？）乜都得！」問到多不多fans去睇牙？他坦言：「不嬲都唔少，我自己就盡量分返開，你嚟睇牙就當你係尊貴嘅客人，你如果喺門口想影相，我就當你係歌迷。（如果睇完牙搵你影相？）都得嘅。我自己想分開啫，咁人哋嚟都知道係明星牙醫咁樣。我自己就低調，但係宅心仁厚。」

許廷鏗望欣宜做第一個客人

開幕當日會否邀請欣宜？他回答：「我都想，地點近咗佢㗎啦！應該係方便佢，佢嚟嚟去去都係嗰幾個地方，港島應該係OK啲。」他表示，暫時未有空搵欣宜：「我想搵佢打牌，我都想放鬆吓。（對上次幾時見？）都係Whatsapp比較多。（成日有fans見到佢）我都冇『捕獲』到佢。（幾時約佢出嚟？）未講呀，小巧生日佢都冇出嚟，再睇啦。（希望你開張時佢嚟）係喎，咁佢嚟會好哄動。（做你第一個客人）我都想呀！」