JFFT不介意被網民叫「磨轆」 做農夫嘉賓狠批嗌回水 : 唔關我哋事 拒因批評作改善

JFFT向來以敢言、行為出位而有名，出道至今憑其組合的獨特風格，在娛樂圈闖出名堂。早前5月農夫舉辦紅館演唱會，邀請JFFT四子陳鈺麟（床哥）、張鋒良（良少）、夏鼎泉（米爺）及李嘉彥（雞翼）擔任嘉賓，但事後遭某些網民狠批「唔好笑」，更有甚者，有人於網上留言嗌回水：「唔講粗口就唔識表演」又指他們為「磨轆」，批評得體無完膚。

JFFT想同隊友去斐濟

今日（8月27日）JFFT的良少和米爺於旺角出席商業活動，現場人頭湧湧，好不熱鬧。他們接受訪問時被問到，最想和其他成員去哪處旅行，良少和米爺異口同聲說：「斐濟。」當中有什麼原因？良少回答：「冇㗎，感覺上hardcore少少，其他地方都浪費，同佢哋去就嘥咗。」與另一半又去哪處？兩人均表示首選馬爾代夫。

JFFT做嘉賓要有交情

談到擔任農夫演唱會嘉賓後，有入場觀眾事後表示要「回水」，米爺直言：「回水咪回水，農夫回之嘛，唔關我哋事。」又有網民說要「鎅櫈」，良少說：「鎅櫈就唔建議啦。」米爺又語出驚人：「鎅紅館櫈之嘛，你唔係鎅我就得㗎啦。」更有網民批他們是「磨轆」。良少和米爺直認不諱，坦然接受「稱號」。「我哋係自稱磨轆，我哋首歌都自稱磨轆，所以冇問題。」又問，會不會因被批評而作出改善？米爺說：「改善就唔係自己。」良少說：「改善就未必有人搵你做紅館。」米爺說：「啲人搵我哋做紅館就係貪我哋呢個狀態，搵我哋就係熟悉我哋，我哋同呢個嘉賓有返咁上下交情，所以搵我哋，我哋就用一個最符合我哋嘅狀態去。」坦言如果迎合大眾期望，自然就不再是原有粉絲們喜愛、想睇的JFFT。