肥媽否認《中年好聲音4》內定自嘲烏鴉口 ：講邊個邊個輸 郭鋒復出拍劇力撐Do姐訪問冇失手

肥媽接受訪問時，提到因節目《中年好聲音》而暫停走埠登台，近期亦安排了不少美加地區登台，但她表示到美加登台可以順道探望子女兒孫，更豪言：「賺到幾多錢一齊使晒佢。」

肥媽談狗咬死人事件感心寒

提起早前打鼓嶺狗隻咬死人事件，肥媽十分憤慨，直言：「其實狗好，咩都好，你養得佢，你一定要負責任。我係特登請個男工人拖啲大狗，同埋我啲狗嘅狗繩唔長。你養得大狗就要有責任，大狗細狗都係。」她又表示，家中安裝了3米高鐵閘，目的就是防止大狗跳牆而出。鄰居會否擔心肥媽的大狗出入？她回答：「冇喎！因為佢睇住我哋出入都係揸住。睇到新聞直情心寒！我未聽過狗咬死人，同埋隻狗咬死哥基都唔得啦。冇責任感嘅人唔好養狗。」

肥媽可惜2個港人爭1分

明天(23日)就是《中年好聲音4》決賽，有傳出現內定名單。肥媽就回應：「點內定呀？又唔係香港，我都唔識佢，係咪收視會高咗？我都唔知幾想有香港人入。周國豐講得啱，我把烏鴉口。我話呢位香港仔得呀，點知輸一分，入梗，講完之後佢個喉嚨發炎。阿康又係，佢應該入到，但係後尾兩集先豁出去，一早豁出去就唔使爭一分。」如果有人問你聽日邊個三甲？肥媽：「我講邊個，邊個輸㗎！」

郭鋒認為太太休息幾年怕觸景傷情

郭鋒接受訪問時談起近況：「ViuTV套劇完咗，好開心知道成績唔錯。」問到參演ViuTV人氣劇集《日落下的彩虹》是否為「過戲癮」還是回歸幕前，他回答：「兩樣都有，彩虹邨係我大嘅地方，好榮幸可以喺度打卡，拍劇，我啲屋企人，朋友都話：『你就好啦，打卡打到咁樣。』好幸福。」

早前Do姐鄭裕玲主持的商台節目《口水多過浪花》中，訪問《日落下的彩虹》四位主要演員夏雨、郭鋒、強尼和陳欣妍，節目播出後，網民批評Do姐鄭裕玲「失手」做訪問「冇做功課」，更有人指「Hea做」。對此郭鋒就不甚介意，說：「都係想大家留意套劇，Do姐有冇做功課，冇乜問題呀，訪問之嘛。」訪問中，Do姐鄭裕玲指郭鋒「收埋自己」，他在訪問中回答：「冇話收唔收埋，太太走咗之後，嗰幾年真係心情好跌落去。因為做戲都係好情緒，可能有啲場景，對白，會觸景傷情，對大家唔住。」所以選擇休息一段日子。