陳瑞輝與女友甜蜜行街不介意被拍 姜濤任韋禮安嘉賓認物理上「衝出羅湖」 MIRROR團綜出動「嗱喳招」 楊樂文暗示盧瀚霆理解力最弱
《東周刊》早前獨家直擊MIRROR成員陳瑞輝（Frankie）與女友Christy在女裝店揀衫時，Frankie更化身「跟得男友」寸步不離兼溫柔給予意見，非常甜蜜。昨晚Frankie與MIRROR其他成員到銅鑼灣拍攝團綜《MIRROR ACE》，被問到與女友甜蜜行街時，他表示不介意與女友一起去街，所以出街被拍到是非常之正常的事。
陳瑞輝與女友感情好穩定
至於女友現在是否成為助手，幫忙處理工作上的事情？他說：「我都有睇過篇報道，咁大家當係娛樂新聞笑下就算，真係唔好咁認真。」至於是否已不怕分手魔咒？他表示沒有想過，問到兩人的感情狀況是否好穩定？他表示係，但不想說太多，至於是否視女友為結婚對象以及何時好事近？他也表示不想講太多。
MIRROR團綜有派錢
提到拍攝團綜，MIRROR指總共會拍八日，而今日是第三日開工，見當中大部分成員如Jer、姜濤及Ian等也顯得頗為疲倦，他們笑指最大的挑戰就是要早起身，又指今次除了會有運動外，也會有很多遊戲，當中也會有體能、心理及人性猜度等，問到是否有AK希望的抽獎環節？他指沒有，但有派錢，玩遊戲更會有獎金。
MIRROR挑戰桌球選手吳安儀
而今日拍攝方面主要是挑戰桌球選手吳安儀，隊長Lokman透露用一個非常之有新意的方法跟對方比拼，不過Alton就笑指大家是一起用「嗱喳招」去比拼：「我哋個遊戲設計就唔係一個好乾淨嘅，唔係好正式嘅，因為有綜藝元素，所以大家都係玩得好開心。」Lokman也笑言怕吳安儀玩完後從此對桌球失去信心，問到誰人最「嗱喳」？他們就笑謂「大家都咁嗱喳！」至於今次團綜會否分享心事？Lokman就指仍未有這樣的環節，只知要開心和好玩：「我諗都係圍繞住一啲歡樂、刺激、污衊嗰啲遊戲，（唔會喊？）會笑到喊！」至於誰玩遊戲最渣？Lokman就指大家有強有弱，但大爆當中有人理解力有問題，規矩要問很多次，雖然沒有開名，但他們眼神就似乎望向Anson Lo（AL），而姜濤亦指是最左邊其中一個，不過當Edan被問到是否他時，他即愕然地說：「我？係呀，係我係我！」
盧瀚霆晒半裸相激勵自己
提到Jeremy早前飛甩旅行腳AL，改與Edan一起去旅行遊日本，兩人笑指旅行是8年前而不是最近去，不過Jeremy坦言因AL沒空，問到AL是否因拍劇所以不能去？他聽後反問Jeremy：「你哋幾時去㗎？」Jeremy就指有邀請AL，只是因他要工作而夾不到期，問到AL主演的劇集《金秘書為何那樣》拍攝進度？他指已完成一半，應該還有一個月時間左右便拍完，又指很多日拍攝時間也接近20小時，所以經常不夠瞓，不過他表示劇組所有人都不夠瞓，工作人員更可能超過20小時工作，大家用盡全力去拍劇，也是想出來的效果好，但認為這樣的辛苦也值得。對於他在片場瞓覺相被曝光後搞笑問貼相的小編是否想轉工，問到小編是否仍健在，AL指對方仍有做，更笑說：「我比緊耐性，容忍緊！」AL早前在社交網站中大晒半裸相，更露出人魚線，對於他工作那麼忙還要keep身材，AL說：「都要keep，做個紀錄，因為真係都不容易，所以都想記錄吓同埋激勵吓自己繼續，唔好放棄。」
陳卓賢盼辦簽唱會
Ian早前完成香港演唱會，被問到之後是否也會有Tour？他表示未知，但檔期暫時較難夾，不過自己也陸續有其他騷做，至於何時推出大碟？Ian就指今年內，現在正準備當中及到埋尾佳階段，至於到時是否會搞簽唱會？Ian說：「都係睇下到時，因為今年年尾我哋仲有個團con（演唱會），咁所以到時都要籌備個團con嘅時候，睇下啲時間上點樣去夾，知道都有啲朋友仔會想有個簽唱會，我都好想幫大家簽名留念，因為自己好想出album，覺得好有紀念價值，咁所以睇下會唔會到時協調到呢一件事，睇會唔會可以發生到。」另外，提到他的「23之約」是否仍然繼續？Ian坦言暫時未知道可以維持到哪一個月，但8月23日仍會推出新歌。
呂爵安有留意TVB新聞
Edan早前為足球活動擔任表演嘉賓，之後有粉絲留意到連TVB新聞也有報道，不過當中最有趣的是記者雖然沒有提到他的名字，但就用他的歌名串連，令報道上雖然「句句不提呂爵安，但句句都是呂爵安」，Edan坦言也有留意：「我覺得旁白好有心，用幾首歌去介紹我，好可愛，好有心思。」不過提到他當日有呼籲歌迷繼續睇比賽，但最後歌迷追星後卻離場， Edan坦言也有看報道，覺得雖然有人會離開，但大部份也有留下來看比賽：「我見到有好多fans都睇到最後十二碼階段，可能個標題比較嘩眾取寵，想大家睇報道啩！我覺得一件咁有意義，去支持香港本地運動員嘅事情，唔應該將Focus擺喺呢啲地方，本地年青球員同曼聯年青球員去切磋，佢哋兩場都贏咗，我覺得Focus應該擺喺呢啲地方。」
呂爵安月底拍港版《悠長假期》
至於Edan演出的港版《悠長假期》，他表示月底會開拍，已經開會及試造型，問到衣着方面是否也會跟足原著？他表示沒有特別去參考，因改編後是圍繞香港本地的感覺，加上年代不同，所以自己不會覺得有特別去參考。
江𤒹生開心送小巴牌給拜仁球員
至於AK最近也有接觸拜仁慕尼黑的球員，他指自己是獲邀觀賽，當日更送了一個寫上球隊名字和香港的小巴牌給球員Tom Bischof，覺得那是一個幾開心和幾有趣的晚上。
姜濤否認有能力阻止肥仔結婚
另外，姜濤最近幫ERROR成員肥仔拍片宣傳新歌，不過當中就指姜濤因為獲得《全民造星》冠軍令肥仔結唔到婚，姜濤笑言劇情是何啟華想，自己只是跟劇本去讀：「我冇呢個能力阻止佢，係咪先？一個男人想結婚係阻唔到，（即係肥仔問題？）係呀，我唔知，總之唔關我事。」
姜濤任韋禮安嘉賓「衝出羅湖」
提到他早前擔任韋禮安演唱會嘉賓，他坦言頗開心，可以去不同的地方表演，自己也很多謝前輩的邀請，對於他這次演出被指示衝出羅湖，姜濤說：「物理上係嘅，睇你點理解呢句說話，人人都有機會，（會唔會想再北上？）物理上去邊度都得，我哋唔可以限制任何可能性，我哋去任何地方都開心，喺呢度工作都好開心，（會唔會有咩唔習慣地方？）離開大家好耐，冇咗大家，我會唔開心，所以今日我好開心。」至於是否想MIRROR一起北上？Lokman說：「衝上月球好呀，上月球開演唱會應該都冇人試過，如果我哋能夠成為第一隊在月球開演唱會，俾錢都去。」