鍾雨璇接連捲入爭議 假波鞋案未解決又因胞弟公審游莨維 網民質疑博見報：好冤枉
鍾雨璇O3早前在港鐵站生擒賣假波鞋的騙徒並為友人即場討回過千元，卻惹網民質疑自導自演造新聞。O3今日擔任活動司儀，被問到事件有否後續？她坦言好多網民罵點解不報警拉人？她解釋其實因騙徒拖晏了交收時間，自己之後要工作，趕時間而帶不到他返警署，事後有立即通知警察，她又指其實下午有收到警方聯絡，因之前有就事件報警。
鍾雨璇否認做女英雄
提到好勇不怕人身安全，O3坦言有擔心，舉例若似日前南亞男子拿刀斬人案都應付不到，但真想幫朋友討回金錢所以沒想太多，如再選擇都會做。她否認女英雄，雖然有研究過做類似《東張西望》的節目，家人都有講是好事，但可能有機會被人偷襲的危險，所以捉完騙徒的半個月，爸媽都提醒她出街要留意身邊，勿只顧看電話，自己看完新聞都覺得現時在公眾地方一定要觀察四周。
鍾雨璇胞弟發文狠批一蚊Joe要爸媽出馬刪文
對於弟弟發文狠批游莨維(一蚊Joe)一齊工作時沒專業操守，O3直言凌晨見到弟弟的發文就好嬲致電弟弟，最終要爸媽出馬叫弟弟刪文，但已太遲，她最無奈因兩件事太近而被指造新聞，強調自己有訊息對話證據並無造新聞，坦言好冤枉。
鍾雨璇解釋胞因推撞媽媽致失控
追問是否游莨維當時不專業才令弟弟嬲？O3解釋：「其實係因為我講咗一句：『我唔紅就要做多啲嘢㗎啦！』跟住衝突之下我細佬唔小心推到我媽咪，媽咪叫佢冷靜，撞到個頭，我細佬先至會控制唔到自己放上網。」O3又指無心搞到阿Joe，指對方有小朋友，不想影響他工作，想向他講不好意思。
鍾雨璇強調以和為貴不想多衝突
O3解釋連助手也數一蚊Joe不是，是因當時在現場幫對方貼司儀卡，對方回應「Oh my gosh」而無講「唔該」，因此激嬲助手，覺得他不幫手也不緊要，不明白點解不是答「唔該曬」，所以她弟弟知道後都嬲。她表示有向弟弟道歉，親戚也幫弟弟，只是她是行內人不想多衝突，以和為貴。
鍾雨璇看好2號李澤欣讚天然靚
O3今日與應屆港姐候選佳麗同場，她表示最鍾意2號佳麗李澤欣，細個做model時見過對方已覺她好標緻，讚對方現在長大更靚，又證實對方是全天然，看好對方。