陳凱詠自爆係「麻煩友」唔聽前輩勸告 紅館開騷似意外懷孕既驚且喜 丨獨家
獨立歌手陳凱詠（Jace）推出全新跳唱歌曲《SWITCH》，MV中呈現現代年輕人，以多重身份穿梭生活狀態，故尾段加插特技場面，JACE的頭竟如蛇般詭異延伸，隱喻現實中的她，如「貪食蛇」會貪心地將好多嘢塞入一首歌內，她更自嘲是麻煩藝人：「簡單嘅嘢刺激唔到我！老細見到都唔會簽我呢種藝人啦。」採訪：方騫平 場地：麗晶酒店
除MV特技外，今次歌曲音樂變化多端，形成聲線由溫柔變撕裂，就連5個造型全部都不同：「所以有啲攞苦嚟辛，但我冇辦法簡單就算，預咗血流成河打仗。」Jace坦言，獨立製作代價高昂，加上她貪心做法，每首歌最少開支逾6位數，每日睜開眼，有工作就是有成本：「比如排舞要幾多個鐘？間房要幾大？MV要拍幾耐？海量單據真係滴汗！」
她自爆，這種執著屢遭業界前輩勸阻及潑冷水：「唱片監製馮翰銘（Alex Fung）直言『唱下情歌咪算囉！』甚至多位唱片公司高巨層好言相勸『做唱片好貴唔值得。』」面對現實考量，Jace一度陷入現實掙扎：「我只係個女人仔，並冇金主冇底。仲有有幾多個6位數可衝呢？有時真係唔敢衝得太遠。」思前相後，卻堅持親身試煉：「我唔係HEA做歌手，係有宏願想試！暫時頂得住就試住先。」語畢，亦不禁苦笑：「下年你(記者)再問，可能到時我已疊埋心水唱返情歌，唔搞咁多嘢呢！」成為獨立歌手近兩年，收支平衡的Jace形容自己於鋼索上前行，經營如履薄冰：「如果要蝕錢就做唔落去，因為冇人貼我嘛！但賺到唔係穩袋，可能下一舖使晒，仲要留嚟籌備專輯同演唱會⋯⋯」
最驚佗唔穩紅館BB
提及明年初意外獲批的紅館個唱，她以「意外懷孕」妙喻：「當初抱住嘗試心態入紙申請場館，申請過多次，不停入完又彈，彈完又入，最後竟然得咗，以我年資算係快申請得到，落實後驚到尖叫，反問『哎呀！死啦我係咪ready呢？呢啲都係我問自己嘅問題。』突然『有咗』個紅館B！我夠唔夠錢養大佢？講真，壓力源自多方顧慮，包括觀眾消費意欲低迷，大家寧願畀錢睇GD、lady gaga，點解要睇Jace呢？而且男歌手更受市場青睞、跳舞女歌手成本更高⋯⋯」除此之外狀態都是問題：「咁短時間我嘅健康、情緒狀態頂唔頂得住佗穩呢個B？」她更將今年《Chill Club》失誤令她添上危機感：「每次做得唔好就要諗點調整，獨立歌手冇失手空間！呢次小失誤提示我『呢個世代變得咁快，我再得唔到大家欣賞嘅目光好快會冇。』」至於好友周殷廷的率直亦成為警鐘：「佢直話直說，提示『你淨係出自己鍾意嘅歌，下次冇人聽點算？』我好需要有人直接提醒，其實我都經已調節咗，只不過死唔信邪想試多舖先。」
父母成為最大後盾
面對種種難題，Jace慶幸父母成為最大後盾：「佢哋冇畀過任何壓力我，包括事業及感情上，反而會畀空間讓她做喜歡嘅事，最記得喺雪藏時最失意期間，爸爸如軍師般跟我分析局勢，畀我『疑人勿用』生意哲學；喺廚房入面嘅媽媽就鼓勵我『其實做人好簡單，最緊要開心，唔好諗咁多，你已經好叻㗎啦』我哋一家三口健康快樂成長，成為我工作最大推動力。」