关智斌为个唱密谋「屈金计划」增财气 老板宠爆送金帆船：一票难求！

关智斌（Kenny）昨日（5日）才宣布开演唱会，今日（6日）就已经心思思想去英皇珠宝「扫金」旺一旺，而且有全盘计划，谂住施展「屈金大法」搏老板英皇集团主席杨受成博士送礼，点知杨博士竟然快他一步，一早准备了一只「一帆风顺」金帆船等他，Kenny即刻开心到弹起兼自爆：「我仲谂住屈佢㗎！」

Kenny捕住老板巡舖

Kenny笑到四万咁口自爆整个「屈金计划」：「我头先特登打俾老板秘书，问老板会唔会巡舖，谂住捕住佢，等我有折头或者屈吓佢送嘢嘛！」结果真的被他捕获，杨博士一入舖见他「先系吓一跳，然后得啖笑」，「我有嘢送俾你呀！」Kenny即刻呆咗：「吓？我仲谂住屈你㖞老板！」杨博士随即着同事拿出预先订制的金帆船，Kenny即兴奋，「真系㗎？多谢呀老板！我仲谂住要出招㖭！」

Kenny迷上「摆金阵」

自言是「八卦仔」的Kenny直言最近迷上「摆金阵」，「话要多啲金嘛！我谂住录音室、化妆间全部摆金！」点知杨博士一句「啲金好贵㖞，你条友仔！」笑爆全场。Kenny又雄心壮志地说：「我而家目标好明确，做好个Show，下次再开就可以收多啲金……同埋表！」更笑指这是员工福利。杨博士为Kenny打气期间，突然爆句：「听讲你个『波霸』好犀利！」Kenny即急急澄清：「个Body吖嘛！到时Show俾你睇。」吓到老板耍手拧头，「哗！唔使唔使！千祈唔好！」最后杨博士赠句「一票难求！一帆风顺！」力撑，Kenny即冧爆话：「我会努力！争气！」
 

临走前，Kenny得意洋洋谓：「任务达成！抢咗嚿金返嚟……呀，唔系抢，系老板送嘅！」至于点报答杨博士？Kenny话必定全力以赴，瞓身做好个Show：「咁就可以再收多啲金！」唔知下次会「屈」到咩呢？