蔡少芬婚姻現暗湧？曾因上海疫情封城張晉一舉動爆喊：好慘又孤單
TVB千禧年代四大花旦之一、「最年輕視后」蔡少芬與老公張晉於2008年結婚，二人密密造人，誕下兩女一子，家庭生活看似美滿。蔡少芬近日亮相謝寧及蘭茜的YouTube頻道節目《Happy Women’s Club》，大爆與老公張晉近17年的婚姻，曾經現暗湧。
蔡少芬為愛流淚無數次
蔡少芬昨日（3日）的訪問中，自爆曾為老公張晉流淚無數次，有一年生日更因為張晉的舉動，令她情緒崩潰，在公園內爆喊，蔡少芬坦言當時感覺有老公在身邊，卻如沒有一樣，大感委屈。
相關閲讀：51歲TVB視后蔡少芬精打細算 北上整平價指甲 珠海山姆狂掃一類產品！
蔡少芬自爆婚姻曾現暗湧？
節目中，謝寧及蘭茜問到與老公張晉的相處之道，蔡少芬坦言：「我哋唔係外人睇到咁好嘅，我哋試過有一段時間，我係成日為佢喊嘅。」蔡少芬表示在上海生活兩年，因為一度遇上疫情封城，而張晉當時工作忙碌，蔡少芬要獨自照顧三個仔女，她說：「我自己又有工作，我好想依賴佢（張晉），但我又唔敢依賴佢，因為佢太忙，因為疫情佢又不能夠中間返嚟睇我，佢只能夠喺電話視頻，都可以喺佢面前喊。」
蔡少芬鍾意黐屋企人
蔡少芬續指一個女人，加上離鄉別井，會需要有人在身邊支持：「嗰種無形壓力，因為我鍾意黐屋企人，鍾意黐朋友，嗰吓好似冇親人喺度，好孤單。」蔡少芬當時等女兒返學，1歲半大的細仔睡著後，便踩單車到附近的公園喊：「好唔開心，好難過，（唔係老公令你唔開心？）佢做唔到啲乜嘢令我唔開心囉。」
蔡少芬被打亂原計劃
談到情緒爆發臨界點時，蔡少芬表示：「去到我崩潰嗰日，就喺我21年定唔知22年生日，我等佢（張晉）返嚟，佢返到嚟病咗，感冒、大病，佢一病就好辛苦。佢要記歌詞又要繼續開工，佢返嚟幾日，咁啱我生日喺度，我早上帶咗小朋友出去玩，諗住返嚟（張晉）夠瞓喇，我哋就出去睇戲，兩公婆食Lunch，夜晚就可以同啲細路仔慶祝我生日。」
蔡少芬覺得自己好慘
怎料張晉瞓到午飯時間，向蔡少芬表示好攰，想在家中食飯，二人之後商量是否外出睇戲，最終有張晉揀選電影：「成個過程佢睇戲，又瞓著，又睇吓，我覺得好似各有各睇，我覺得好慘，突然間好孤單。我當然係諗自己，唔會諗佢病啦！生日大晒吖嘛，我咁耐都唔嗲你，我嗲你一日都唔俾機會我呀？」
相關閲讀：蔡少芬二女小學畢業！同校多名人明星二代與張栢芝兩子做校友 全年學費逾14萬元
蔡少芬為張晉誕下兩女一子：
蔡少芬還爆老公張晉睇完戲後自己行在前面，表示好辛苦要返去食藥。張晉當時曾問過蔡少芬，她稱：「冇嘢！你返去先。我唔想講嘢，因為我知我一講嘢，我就知我會喊。」接著張晉跟在老婆身後，蔡少芬走到公園坐下後爆喊：「我覺得咁多日我自己一個，我生日我唔係好多要求啫，我朝早都畀你（張晉）瞓啦！我乜都就晒你啦！睇戲我好似自己一個睇，點解我哋連下午茶飲杯嘢都冇機會，我覺得我好委屈，Sorry我比較自私。」不過蔡少芬有收到老公張晉送戒指作為生日禮物。
張晉向蔡少芬道歉
張晉為安慰蔡少芬：「佢就話唔好咁啦老婆，我真係好辛苦，咁我就爆出嚟，鬧佢囉，點解咁樣，我以後唔好有要求，冇要求就唔會失望。平時我唔會要求，生日我都唔會要求，以後唔會有要求，你放心。」最終張晉忍不住落淚，蔡少芬形容老公當時表示：「我都係辛苦啫，我知錯喇！以後都唔會。」蔡少芬坦言當時可能是自己抑鬱，因不少原因所至。