秦煌唔觉系悲惨老人家：最紧要心态好 孤独过80大寿只求有美食丨独家
因行动不便入住护老院大半年的秦煌，于2月16日在老人院渡了第一个生日，虽然院内不设庆祝活动，亦没有他期望中，能够跟家人开开心心，简简单单出外食餐饭的画面，但当日却喜获《星岛头条》记者送上生日蛋糕及恨食了多年的云吞面。秦煌心态好，不觉得自己是悲惨老人家，反而捧住碗云吞面和生日蛋糕笑骑骑，满足说：「趁有牙食得就食！」 采访：方骞平 摄影：罗安强
80大寿当天，寿星公秦煌身穿深蓝色上衣配衬同色系cap帽，打扮醒神，尤其捧住记者送来的生日蛋糕时更开心到爆猛话：「好靓！」珍而重之表示要留来做宵夜，更指定要交给相熟的夜更女工保管：「唔好畀人偷食！」被问到是否刻意打扮过生日时？煌哥即大笑说：「又唔系？日日都系咁！」
仔女情人唔见人
对于当天子女冇现身；内地情人知己Mary都冇影，秦煌在院内有点孤寂，他却秒速为子女解画：「佢哋要返工，我都唔想搞到咁大阵仗。(咁会否好失望？) 冇失望，呢啲唔关佢事㗎，以前我要返工要做嘢，系我一直教养落嚟冇做到(关心)呢啲嘢，变咗相处方式比较疏离。」至于Mary的事，他就形容都过去了：「呢啲系60岁嘅事，佢过得开心我就开心，𠵱家大家经已少联络。」秦煌又为寂寞生日打圆场：「哈！我都唔再重视80岁喇，因为𠵱家过咗80岁，目标一定系超过90，有90目标就望100，我哋屋企人好长命，所以唔好衰畀佢哋睇。」
快乐不知时日过
谈到生日愿望，他就安于现状：「生日冇特别嘢，都系自己开心啫，最开心系唔使担心财困，唔会好似以前咁忧柴忧米急于揾嘢做。呢一年都ok㗎，除咗有3餐温饱，仲由政府供住，住嘅老人院单人房又咁大间，仲有4000几蚊综援金做零用钱，有时仔女会畀啲钱我，边度使得晒啫？我𠵱家好ok㗎，80岁个人好精神又食得，心态会好过以前。」他坚持最紧要是心理质素好，做人乐观，不会自怨自艾，还自嘲快乐不知时日过，追问2月16日究竟是星期几？又笑说几乎连自己生日都忘掉。现在无甚牵挂的他最开心有美食：「呢度过时过节会加𩠌，一人一份虾、烧肉，啲𩠌多到食唔晒。啲女又会买条烧腩骨上嚟畀我食，哈…好味呀！趁住仲有牙食得就食，唔使拆啲牙(假)出嚟嘛，睇见啲人都好肉酸。」由于老人院规定下午5时食晚饭，夜瞓的秦煌每晚都要食消夜顶肚：「我会畀钱夜班个女工买糕点畀我做消夜，大概$100食到4日；有时揾人推我落街买下零食。𠵱家天时冷仲要饮杯即溶咖啡来暖胃才瞓得着。」化
生日恨食云吞面
讲到食，秦煌最恨食是云吞面：「有10几年未食过，想食好耐都唔敢出声，女工话难买㖞(咁叫仔女买啦？)唔使，嚟到都冻啦。」煌哥还想当年：「20几年前收工会去九龙城食宵夜，𠮶度啲云吞面、艇仔粥好靓，好想回味返当年感觉。」他又表示年青时行得走得乜都食，后来怕脚痛戒食内脏及戒酒。对于他的双脚仍然又黑又肿，煌哥变身「老顽童」说：「我好乖，瞓咗成3/4日床提起对脚消肿，呢个系瞓床效果，对脚开始皱皮及收水，好返好多啦…大佬呀，就算仲系肿都冇办法啦，今年都成80岁喇，年纪大，唔会要求自己行路跑步，我仲可以企喺度，按住张枱喺尿片度『开大』，总之精神就得。」记者完成采访后，专诚徒步10分钟去专门店为煌哥买云吞面送上惊喜，开心到不得了的煌哥话要趁热食，就算食完晚饭都急不及待「队」埋个面，就汤都饮埋。老人家愿望达成，衷心向记者说：「多谢你！」然后回房休息。