歡樂滿東華丨劉穎鏇羅浩銘拉車被質疑造假？ 陳庭欣代揭車上有司機原因：對佢哋好唔公平
籌款節目《歡樂滿東華》昨晚（7日）在TVB播出，不少藝人都有表演希望籌得更多善款。其中TVB小花劉穎鏇（Tiffany）與古天樂旗下武打藝人羅浩銘參與挑戰拉3.5 公噸重的24座小巴及16公噸重的雙層城巴，一共籌得80萬元善款。不過TVB娛樂新聞台將影片上載到YouTube後，卻有網民留言質疑他們造假，引出羅浩銘親自澄清，司儀之一的陳庭欣亦發文力撐。
網民發現車上有司機
重溫《歡樂滿東華》拉車環節可見，劉穎鏇與羅浩銘落場挑戰時，谷到面部通紅及一度跌倒。不過網民更關注小巴及雙層巴士上有人坐在司機位，質疑劉穎鏇與羅浩銘拉車時造假，有網民留言表示：「真係唔好當觀眾傻啦，根本就係個司機開，特別係個巴士去到尾站已經穿崩啦」、「雖然係假，但係做善事冇所謂啦」、「幾十年前已知道假啦」，引起其他網民討論。
相關閱讀：狄波拉《歡樂滿東華》舉動震驚全場！譚輝智搶盡風頭勁過鎮台之寶
歡樂滿東華丨拉車環節被質疑造假？
陳庭欣揭車上有司機真相
陳庭欣昨晚為《歡樂滿東華》擔任大會司儀，陳庭欣在現場見證劉穎鏇與羅浩銘落場挑戰拉車，播出後看到網民一些質疑的評論都忍不住發聲，她在IG留言表示：「排練以至演出當晚都係出盡全力嘅Tiffany 同羅師父實在唔應該收到一啲歪曲嘅評論，唔應該抹剎佢哋認真同努力，咁樣對佢哋真係好唔公平！」陳庭欣列出三點講解拉車環節沒有造假，她表示：「車係喺熄匙嘅狀態 （無動力）；車長坐喺司機位係因為安全嘅原因，萬一出狀況可以隨時將車輛剎停；車身及車後位置都無站立任何人」。陳庭欣亦大讚劉穎鏇，「好respect 呢位小師妹，我睇住佢嗰份無比熱血同毅力，唔單止用盡體力，佢喺用埋個心！其實去到最後16米開始我哋見到佢已經開始筋疲力盡，但係佢都捱過去～當刻現場有工作人員叫佢唔好勉強再拉，因為會整親自己。Tiffany當時係聽到㗎，但係佢唔放棄，就算跣腳仆倒佢都仲繼堅持，直至監製走埋嚟拍佢為止佢先肯停。我哋現場所有人都睇到好『滾動』！」
狄波拉捐百萬支持譚輝智？
羅浩銘親自解謎思
羅浩銘更在YouTube影片下方回應網民的質疑，他留言表示：「多謝大家支持，司機坐係裡面係安全同保險問題，他沒有踩油門，車也沒有啟動。外國 world strongest man基本上每年都有 bus pull 環節，我明白大家會有懷疑，但我們對得人、拜得神，是訓練出來的成果。我有沒有司機的訓練片段，可能過後 upload 在自己的頻道吧！」羅浩銘的回應獲網民支持，「明明羅浩銘和劉穎鏇都很努力練習和表演，有些人不appreciate反而冤枉人家。兩位加油！希望沒弄傷。這種危險表演真的吃力不討好。」、「很厲害，我相信你，希望你沒有受傷。自己問心無愧就可以了，不需要理會其他人的冷言冷語。」、「好犀利」。亦有網民認為直播時應該補上更多畫面，避免遭受質疑，「正常人見到有司機都係覺得做假，如果唔想觀眾以為係假，建議下次當場影埋熄匙個shot」。此外，羅浩銘亦在IG上載彩排時沒有司機在車上的片段，可見他同樣能拉動巴士，證明沒有造假。