高钧贤赞冯盈盈好吸引：单身可以考虑 衰戏屎沦为「色魔」搞阿婆终觉悟丨独家

39岁的高钧贤（Matthew）于新剧《逆天奇案2》中再饰演暖男，反应不错，更唔怕传绯闻狂赞冯盈盈。Matthew于2005年夺「香港先生」冠军入行，一夜成名后变得心高气傲，4年后在《幕后大老爷》升呢男二，更因NG太多声名狼藉被监制拒用，之后被贬为色魔，在《寒山潜龙》中更要非礼阿婆，Matthew感激惨痛经历令他成长，学识唔好再Chok住演戏，入行19年终于觉悟：「靓仔冇用嘅。」采访：方骞平 摄影：朱伟彦

阔别TVB 6年，高钧贤回巢拍剧获赞演技大跃进。

 

高钧贤于新剧《逆天奇案2》中再饰演暖男。

 

高钧贤今次向难度挑战，演绎完美情人。

 

高钧贤对曾经沦为配角终有觉悟。

 

曾有挫折令他逆流而上。

 

高钧贤今次向难度挑战，演绎完美情人Daniel，更奉命帮手调教冯盈盈，戏里戏外都变得温柔体贴，唔好咁嘈，以配合高学历兼十项全能的黑客人设：「我会用温柔声线提佢要投入，希望观众睇到佢嘅角色有经历及有成长，扭转『小三』嘅黑历史。」

Matthew和冯盈盈获赞有CP感。

 

Matthew真心赞盈盈好多优点。

 

高钧贤演世上难求嘅完美情人。

 

 

演到似系生死恋。

 

冯盈盈变得温文。

 

两人演得投入。

 

高钧贤奉命帮手调教冯盈盈。

 

处处保护冯盈盈。

 

激赞盈盈超多优点

提到跟冯盈盈逛深圳超市被野生捕获，两人有讲有笑，盈盈仲系咁甜笑，Matthew否认两人假戏真做，「盈盈演出前有一段日子冇拍过戏，而今次着重我哋嘅感情线，监制要求我哋要多啲沟通，咁啱𠮶日外景后有空档，就即兴带佢同助手北上行超市，买零食请剧组食，我同盈盈冇试过私人约会。」对于冯盈盈，Matthew直认好吸引，随口噏都有大堆优点：「佢系一个聪明好女仔，我未见过一个女仔背剧本可以咁叻，好佩服佢，港大毕业系唔错，佢由内至外都优越…自己都钟意啲叻女。」赞到盈盈只应天上有，问到有冇一刻心动？Matthew答得老实：「我经已有一位圈外女朋友，如果系单身都可以考虑嘅，我拍戏10几年系『老屎忽』，感情上唔会有混淆，控制唔到感情会好大镬。」

Matthew和冯盈盈约埋行内地超市传绯闻。

 

原来同行有金毛女助手。

 

步伐一致。

 

做人正面唔好怕挨

Matthew靠《新闻女王》令事业重新弹起，更在内地人气急升兼获封「国民女婿」，他「食住个势」落力做带货直播，赚到盆满砵满。回想19年来的失意经历，他冇埋怨：「以前演技及经历系未够好，成为港男时系一张白纸，完全未准备好就出道，最惨呢行好残酷，冇人等你成长。反省返当年句句对白只系Chok出嚟，真系靓仔都冇用！好彩我够乐观，又冇危险感，做包薪艺员，冇嘢做都照有粮出，坐冷板凳𠮶几年沉迷打篮球，直至30岁完约，想有多啲进步空间才决定外闯。」满约后的Matthew转战内地，初期都唔多顺利，最终挨到做《包青天》的展昭，在40度高温下辛苦拍咗3个月，最后胎死腹中。Matthew从人生经历得到结论，认为做人要保持正面，练到心脏强大逆流而上最重要：「有段日子我系咁做网上job，只要愿意尝试冇话唔得。」

2005年高大靓仔的Matthew成为首届「香港先生」。

 

Matthew获力捧，得奖翌年跟胡杏儿拍《肥田囍事》。

 

2009年Matthew以男二身份跟马国明拍剧集《幕后大老爷》。

 

2014年拍完《飞虎2》后离巢。

 

Matthew于离巢前做咗几年奸角及色魔。

 

2014年拍完《飞虎2》后离巢。

 

拍内地剧曾同罗嘉良合伯。

 

内地拍剧做过男一。

 

男女啱用keep靓秘诀

Matthew离开TVB 6年，重返全因挂住香港观众，亦希望睇住佢入行的观众能见证他进步唔再「戏屎」。对于被赞系「不老男神」，身形及样貌都Keep得好，「影后」时更被发现有结实又浑圆臀部。Matthew公开男女都啱用的keep靓秘诀：「刮痧通淋巴及饮汤水去湿好重要，身体湿重会影响脾胃及皮肤，个人又容易攰，所以我经常饮去湿茶、五指毛桃去湿汤、有时饮花胶鸡汤补身，早上食苹果及饮一杯咖啡，有时改食小米粥，仲会保持运动量。」

失意时Matthew跟余文乐、何韵诗、吴浩康、张继聪打篮球发泄情绪。

 

高钧贤曾因脚伤失掉再做男二机会。

 

Matthew跟陈展鹏对打，被观众发现前者的臀部浑圆结实。

 

 

《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

想睇更多精彩内容，请立即浏览「区区有申诉」活动专页，https://bit.ly/41hgS9E

紧贴最新最快新闻资讯，请立即下载星岛头条App：https://bit.ly/3Q29Vow