独家丨尹光爆旧史曾劲嬲叶子楣:𠮶阵死忍 纵横歌坛68年大爆娱圈潜规则
3个月前「AI尹光」Cover姜涛的《Dear My Friend,》及林家谦《一人之境》等歌曲成为全城热话，79岁尹光突然翻红更被封「光B」，收入激增8倍以上，更带挈他重返阔别14年的红馆，于11月4日举行《尹光WAN K.宇宙巡逻演唱会》，下年80岁(按当事人透露)生日更打算搞慈善Show回馈社会。见证香港乐坛兴衰，屹立不倒多年的尹光大爆娱圈潜规则，又开心分享3大襟捞秘技，边一个行业都啱用，再自揭收埋多年嘅「小器簿」。采访：方骞平 摄影：邓国良
1991年，当年酒廊及夜总会式微，「庙街王子」尹光一年登上3次红馆开个唱，创下佳绩，令打算转行的他起死回生。18年后，再举行《2009爆金烂演唱会》，连尹光都估唔到，时至今日获AI再推上红馆。今次除会选唱首本名曲《少理阿爸》、《雪姑七友》、《荷里活》、《数波波》等外，还会演绎「AI尹光」唱过嘅歌及首次演绎冧歌《Dear Myself》。至于可会请埋姜涛做嘉宾？尹光坚持交由主办方特高娱乐负责，因为他朋友太多不便参与。
搞慈善粤曲个唱贺大寿
尹光谐趣歌曲风格无可取代，虽然「独市」，但曾赌钱输身家，每月跑数的他依然抱住天跌落嚟当被冚态度，只要有工开就唔怕冇钱还，直至1984年开始戒赌及储钱。尹光目前乘势狂接广告，坦言连坐喺度拍两吓掌声都有钱收，追问系咪揾好多？他即敏感收口：「唔讲钱，钱多少唔系问题，𠵱家最重要身体健康，我唔会饿死，好一餐；唔好又一餐。趁明年80岁生日，搞慈善粤曲演唱会，扣除一啲拍膊头开支，一个仙都唔收全数捐晒出去，回馈社会，亦永不言休。」
歌星越界交友只会变𤓓
唱足68年，好有经历的尹光勇于分享人生大道理及娱圈潜规则：「呢行人气相当重要，去到呢级不能爬上𠮶级，一线歌星会有一线歌星班Friend，唔会同2、3线歌星玩，因为『我名咁大点会同你玩！』正如有钱人有上流社会朋友，穷人有穷人圈子，好正路。虽然有啲人口讲话乜都得，但未到𠮶个位唔会知系点，好似啲人话中咗六合彩会分钱畀人，因为未有嘛，做咗皇帝就想升仙啦…不过，我好肯定唔会咁样对人，因为我只系一个唱歌揾食嘅普通人，任何人叫我合照都得。」
细歌星食得咸鱼抵得渴
自言睇化晒嘅尹光仲寄语后辈要忍得：「尤其细歌星要食得咸鱼抵得渴，鬼叫个名唔够人哋大咩！」尹光再自揭收埋心底多年嘅「小器簿」，称当年举行演唱会记招，明明自己系主角，受访中段记者竟跑晒过去揾刚到场嘅「波霸」嘉宾叶子楣，受冷待的他劲冇瘾：「𠮶日好心酸，连主角都要企埋一边系会介意嘅，但都要忍呀！咁人哋系『波霸』咁有名，我『数波波』都有排数啦。」尹光坦言同行如敌国，唔抵得人哋红过自己，唔忍得系好戆居嘅事，「不过，𠵱家唔会再争风呷醋，因为我个位置冇人摄得到，全港歌手冇人唱我啲歌，如我喺日本就系政府包养嘅国宝，所以你钟意点就点，最重要行得、食得、走得，开开心心就算，我同叶子楣反而做咗朋友，不时会相约食饭。」另外，呢行信用好重要，他唱歌多年敬业乐业，有早冇迟，会落力记好歌词。