俾陳展鵬讚「好女仔」　傳單文柔擦鞋叻係是非精

陳展鵬日前被影到同今屆落選港姐單文柔山頂談心兼開餐，佢即表示無同胡定欣拍拖，單文柔係自己Stylist，依家單身，同任何女仔都可以有發展機會之餘，更直認欣賞單文柔。

其實26歲嘅單文柔係今屆落選港姐，畢業於倫敦藝術學院，主修布料設計，參賽前係一名布料設計員。單文柔喺港姐競選賽前唔係大熱，不過最終爆冷晉身十強進入決賽。當晚陳展鵬都係評判之一，選「最上鏡小姐」和心水「電視劇女角色」環節時，陳展鵬都力撐單文柔，似乎一早已經過電。

落選後單文柔參加藝員訓練班進修幾個月，有傳大台打算安排佢主持兒童節目《Think Big天地》。包包面嘅單文柔，有鄰家女孩味道，不過參選時有報道指佢係是非精，鍾意搞小圈子，不時黐住大熱佳麗狂讚對方靚，又落足鞋油奉承工作人員，仲特登整蛋糕畀保母同海外佳麗食。有傳單文柔對住一啲陪跑分子就兩個樣，見人擺亂少少嘢就立即針對人，仲鍾意篤人背脊。

另外，單文柔與陳展鵬傳出緋聞後，唔少網民走到單文柔嘅社交平台留言，有偏激網民不滿單文柔成為陳展鵬緋聞對象，「你破壞咗佢同定欣螢幕情侶的形象」、「借展鵬上位？」亦有人平心而論「男未婚女未嫁，有戀愛自由，緋聞是否真的也支持你」。