手球｜女子手球隊力爭挑戰盃奪冠升級 沙灘手球邀請賽疫情後再復辦

中國香港手球總會周四除了宣布「2025-2026 中國手球超級聯賽男子組（第四階段總決賽）」首次落戶香港外，亦宣佈「國際手球聯會挑戰盃」女子成人組賽事將首次移師亞洲在香港舉行，提到有機會可以主場出擊迎戰各代表隊，港隊的莊斯淇和張敏珊亦感期待，並力爭打出好表現升格。

IHF女子成人組賽挑戰盃首落戶香港

今屆在名古屋亞運，香港女子手球隊以追平隊史紀錄的第六名完成，而今屆IHF女子成人組挑戰盃則是首次落戶亞洲，並在香港舉辦，於10月14至18日在馬鞍山體育館上演，港隊將會對上朝鮮、中國澳門、蒙古、中華台北以及越南，市民可以免費入場為港隊打氣。

提到今屆亞運的表現，港隊的莊斯淇表示在比賽中加深了攻防和速度上的認知，相信可以有助更好地應付水平相當的對手，而張敏珊也認為球隊對上以往對過的球隊分差有所收窄，反映出球隊正在進步：「我哋贏咗越南隊，然後對烏茲別克差一分，之後對上日本、韓國呢啲一線亞洲隊我哋嘅分數都拉近咗，就算對上國家隊我哋一開頭都有拉鋸，着到可能換一啲年輕啲球員落去先俾佢哋拉開，所以我認為我哋成績同表現係有進步到。」

而對於IHF挑戰盃的期望，張敏珊直言以第一並升格打洲際賽為目標，她也很期待能夠在主場一眾球迷面前出戰：「對於我哋呢啲球齡好耐嘅人嚟講呢，係真係好興奮。因為喺香港，即係父母好少真係會出到去其他國家，因為我哋又會去海外比賽，佢哋好少會去到，但喺香港佢哋可以直接過嚟支持我哋。」而被問到去年看到男子隊在全運會中大受支持，會不會期待今次的比賽同步得到眾多球迷支持時，張敏珊直指：「梗係想啦，邊個唔想人支持喎？」她指出去年的經驗能夠看到香港人真的好支持香港的運動員，就算成績可能不是很好，但只要能夠展現出拼搏和運動精神，香港人也會給予很大的支持，所以也希望到時可以呈現出一種讓香港球迷看到女子隊同樣具備這些特質。

盼有更多室內場地作使用

而提到備戰狀況，她們透露前日已經開操，雖然有少少傷患問題但係都是小傷，而人腳上亦有少少不一樣，但備戰時間尚算充裕，但因場地問題，所以近日都在室外場地作訓練，近日會轉回室內場操練。而本地手球運動一直以來都因場地所限而很多時要在室外訓練，莊斯淇也指出亞運令她體驗到本地手球場地上尚有不足：「如果能夠有個再好少少嘅場畀我哋訓練，對於我哋嘅膝頭嘅承受嗰啲，其實傷患會減少好多，亦都可以令到我哋技術再快速提升。所以我哋都係好希望如果場地可以足夠嘅話，都可以喺香港變成一個室內打手球嘅運動。」

沙灘手球邀請賽疫情後復辦

而另外「紫荊盃沙灘手球邀請賽」再復辦，女子隊的鄭䁱霖也表示相當興奮：「喺香港搞嘅呢個國際賽事，以我所知係喺疫情之前啦，嗰陣時我都仲未開始打沙灘手球，其實一直都好想喺香港有機會可以打到呢個比賽。然後我依家可以喺香港打，我就覺得好興奮。因為喺香港有一個機會可以俾大眾認識到沙灘手球，我覺得可以令更加多人認識到呢項運動嘅有趣同埋魅力。」而男子隊的陳家謙則認為近年有更多機會可以外出比賽，如亞沙運和全運會，令沙灘手球有不錯的發展，並指出：「依家本土有咁樣嘅國際賽事，我自己覺得係非常之興奮。球隊亦都多咗好多唔同嘅之前比賽，有好多球員再加咗入嚟，可能令到我哋嘅戰力或者合作上面多咗好多唔同嘅新配合同變化，所以我都比較期待今次比賽會係點樣。」

記者/攝影：魏國謙