名古屋亞運·男佩｜何柏霖男佩止步16強 望可及時調整團體賽打出好表現

愛知名古屋亞運男子佩劍，港隊的何柏霖最終在16強不敵南韓好手吳尚旭，他賽後受訪表示今日在分組賽已表現不佳，所以入到淘汰賽已處於「放手一搏」的心態，在16強再鬥吳尚旭他感受到對手已有針對他作出應對所以告負，何柏霖希望可以憑今次經驗在團體賽上打得更好。

淘汰賽放手一博去打

應屆亞青冠軍何柏霖首戰亞運即闖男佩淘汰賽階段，今次16強再次對上在世錦賽32強曾擊敗的吳尚旭，但可惜今次能再創神奇以9:15告負，他賽後表示自己在小組賽中表現不佳，所以入到淘汰賽都是以「放手一搏」的心態去打：「因為打完個小組之後好彩出到 pool，我同自己講：我哋係沉底戰術，一路打上去，咁我都冇嘢好輸咁樣。即係小組都打到咁囉，即係唔會畀到任何嘅包袱畀人同埋畀自己。」但他也笑指：「又唔可以咁講，打吳尚旭都有啲包袱。」何柏霖指因為上次贏過所以有一定的包袱。

亞運經驗感難忘

提到再打吳文旭，何柏霖表示對手明顯有對他有針對性處理，他坦言對手準備充足，在自己輸1:8後再調整已經太遲。而被問到首戰亞運的感覺，何柏霖指因為沒有選手村再加上身邊隊友也感覺今屆不像亞運，因此自己也未有太感受到亞運的感覺，自己也當一般表賽打，何柏霖也認為這個經驗也有難忘之處：「因為呢個比賽應該係我數一數二打過最少人嘅比賽。少人得嚟啲人又最勁咁樣。因為亞運個人每個國家得兩個人打，就會好似得幾十人打，但啲人又好勁。好唔慣嗰個氛圍同埋嗰個感覺。」

何柏霖之後也會和隊友轉戰團體賽，提到個人賽的經驗可以為他在團體賽帶來怎樣的幫助，他認為先個人賽可以為他更好地適應亞運，希望可以之後在團體賽打出更好的表現：「我覺得有，因為呢個係我第一次打亞運啦，打咗個人之後，會畀自己個人適應咗少少先。咁希望去到團體賽嘅時候，可以畀自己適應到呢個環境，然後可以竭盡所能發揮到自己平時要發揮到嘅嘢，唔好諗咁多贏唔贏、輸唔輸心態上嘅嘢。」